రామాయణం లీక్ కలకలం.. అసలు నిజం ఇదే

భారతీయ చలనచిత్ర పరిశ్రమలోనే అత్యంత భారీ బడ్జెట్‌తో తెరకెక్కుతున్న `రామాయణ: పార్ట్ 1` చిత్రం నుండి ఒక కీలకమైన యుద్ధ సన్నివేశం లీక్ అయిందంటూ సోషల్ మీడియా ప్లాట్‌ఫారమ్స్ లో చ‌ర్చ‌ ఊపేస్తోంది. కేవలం 11 సెకన్ల నిడివి ఉన్న ఈ వివాదాస్పద వీడియో క్లిప్‌లో రణబీర్ కపూర్ శ్రీరాముడి గెటప్‌లో శత్రుసంహారం చేస్తూ కనిపిస్తుండటంతో ఫ్యాన్స్ షాక్‌కు గురవుతున్నారు. అయితే సినిమా ట్రైలర్ నుండే ఈ విజువల్స్ లీక్ అయ్యాయని కొందరు గట్టిగా వాదిస్తుంటే... ఇండస్ట్రీ టెక్నీషియన్స్ మాత్రం ఇదంతా ఆర్టిఫిషియల్ ఇంటెలిజెన్స్ (AI) మాయాజాలమని... కావాలనే ఎవరో ఏఐ టూల్స్ ఉపయోగించి ఈ తరహా ఫేక్ లీక్‌ను సృష్టించారని కొట్టిపారేస్తున్నారు.

ఈ లీక్ వివాదానికి తోడు.. సినిమా సెట్స్‌ను సందర్శించిన ఒక కంటెంట్ క్రియేటర్ చేసిన వ్యాఖ్యలు ఈ హైప్‌ను మరింత పీక్స్‌కు చేర్చాయి. లీకైన విజువల్స్ పక్కన పెడితే... మేకర్స్ డిజైన్ చేసిన అసలైన గ్రాఫిక్స్ హాలీవుడ్ చిత్రం `అవతార్` రేంజ్‌లో ఉన్నాయని... ఇంటర్నెట్‌లో ఉచిత పబ్లిసిటీ కోసమే మొదట్లో కొద్దిగా క్వాలిటీ లేని ఫుటేజ్‌ను వదిలారంటూ సంచలన వ్యాఖ్యలు చేసి... ఆ తర్వాత మాట మార్చడం హాట్ టాపిక్‌గా మారింది. దాదాపు 3,900 కోట్ల భారీ బడ్జెట్‌తో నితీష్ తివారీ రూపొందిస్తున్న ఈ భారీ సినిమాలోని ఈ లీక్ వ్యవహారంపై చిత్ర‌బృందం క్లారిటీ ఇవ్వాల్సి ఉంది.. ఈ ఏడాది దీపావళి రేస్‌లో ఉన్న ఈ సినిమా బాక్సాఫీస్ వ‌ద్ద ఎలాంటి ఫ‌లితాన్ని అందుకుంటుందో వేచి చూడాలి.