‘నో’ నేను ఆ పాత్రలో నటించలేను: రష్మిక

సినీ ఇండస్ట్రీలో నటీనటులపై వార్తలకు కొదువ ఉండదన్న విషయం తెలిసిందే. కొందరు సోర్స్‌లు తెలుసుకుని దాన్ని గాసిప్స్‌గా రాసేస్తారు.. మరికొందరేమో అదే పనిగా పుకార్లు పుట్టిస్తుంటారు. ఏ క్షణాన తెలుగు ఇండస్ట్రీలోకి అడుగుపెట్టిందో కానీ సినిమా అవకాశాలకు మాత్రం అస్సలు కొదవలేదు. అలా వరుస సినిమాలు రావడంతో ఈ భామకు కొమ్ములొచ్చాయో ఏమోగానీ పెద్ద పెద్ద సినిమాలకు నో చెప్పేస్తోందట. ఇందుకు ఓ బలమైన కారణం ఉందట. వరుస సినిమాలు రావడం.. సినిమాలన్నీ హిట్టవ్వడంతో ఈ ముద్దుగుమ్మ భారీగానే పారితోషికం పెంచేసిందట.

తాజాగా యూత్‌లో మంచి క్రేజ్ ఉన్న రష్మిక గురించి ఓ పుకారు టాలీవుడ్‌లో షికారు చేస్తోంది. తెలుగులో సూపర్ డూపర్ హిట్టయిన ‘జెర్సీ’ హిందీలో రీమేక్ చేస్తున్న సంగతి తెలిసిందే. తెలుగులో తెరకెక్కించిన గౌతమ్ తిన్ననూరే హిందీలో కూడా తెరకెక్కిస్తున్నాడు. ఈ రీమేక్‌లో హీరోగా షాహిద్ దాదాపు ఫిక్స్ అయినట్లు తెలుస్తోంది. అయితే షాహీద్ సరసన నటించాలని రష్మిక మందన్నాను కోరగా.. కథ చెప్పాలని కోరిందట. కథ మొత్తం విన్నాక రెమ్యునరేషన్ సంగతేంటి..? అని దర్శకనిర్మాతలను ఈమే క్వశ్చన్ చేసిందట.

అయితే ఆ పారితోషికం కూడా గట్టిగానే అడిగిందట. కాస్త తగ్గించుకోండి మేడమ్ అని అడిగినప్పటికీ తగ్గే ప్రసక్తే లేదని తేల్చిచెప్పేసిందట. ఫైనల్‌గా ఓ ఫిగర్‌కు దర్శకనిర్మాతలు రాగా.. నో అస్సలు కుదరదని ఈ బ్యూటీ చెప్పేసిందని పుకార్లు పెద్ద ఎత్తున వస్తున్నాయ్. అయితే ఈ వ్యవహారంపై తాజాగా ఆ భామ మాట్లాడుతూ.. అబ్బే పారితోషికం విషయం కాదని.. అంతటి బరువైన పాత్రకి తాను న్యాయం చేయలేనేమోనని ఉద్దేశంతోనే అంగీకరించలేదని స్పష్టం చేసింది. మంచి పాత్రలు వస్తే మాత్రం పారితోషికంతో ఎప్పుడూ ముడిపెట్టనని తనపై వస్తున్న పుకార్లపై రష్మిక క్లారిటీ ఇచ్చుకుంది.