శర్వానంద్ పెళ్ళికి ముహూర్తం ఫిక్స్

నిన్నటివరకు శర్వానంద్ ఎంగేజ్మెంట్ బ్రేక్ అయ్యింది.. అందుకే నిశ్చితార్ధం జరిగి ఇన్ని రోజులవుతున్నా ఇంకా పెళ్లి ముహుర్తాలు పెట్టలేదంటూ ఓ న్యూస్ సోషల్ మీడియాలో హడావిడి చెయ్యడం మొదలు పెట్టింది. పొలిటికల్ బ్యాగ్రౌండ్ ఉన్న రక్షిత రెడ్డి ని ప్రేమించి శర్వానంద్ ఈమధ్యనే అంగరంగ వైభవంగా స్నేహితులు, కుటుంభ సభ్యులు, సన్నిహితుల మధ్యన నిశ్చితార్ధం చేసుకున్నాడు. రామ్ చరణ్-ఉపాసన, చిరు-సురేఖ, అక్కినేని ఫ్యామిలీ, సిద్దార్థ్ ఆయన గర్ల్ ఫ్రెండ్ అదితి లు హాజరైన ఈ వేడుక హైదరాబాద్ లోనే గ్రాండ్ గా నిర్వహించారు.

అయితే నిశ్చితార్ధం జరిగిన చాలా రోజులవుతున్నా పెళ్లి కబురు చెప్పకపోయేసరికి అందరూ వారి ఎంగేజ్మెంట్ బ్రేక్ అయ్యింది అనుకుంటున్నారు. అయితే ఆ రూమర్స్ కి తెర దించుతూ నేడు మే 17 న శర్వానంద్ పెళ్ళికి ముహూర్తం ఫిక్స్ చేసి ఆ తేదీ, ఇంకా పెళ్లి జరిగే వేదికని ప్రకటించారు. శర్వానంద్ రాయల్ వెడ్డింగ్ చేసుకోబోతున్నాడు. జూన్ 3వ తేదీన రాజస్థాన్ జైపూర్‌లోని లీలా ప్యాలెస్‌లో రక్షితతో శర్వానంద్ వివాహం జరగనుంది. జూన్ 3 రాత్రి 11 గంటల నుంచి వివాహ వేడుక ప్రారంభమవుతుంది. 

రెండు రోజుల పాటు రాజస్థాన్ జైపూర్‌లోని లీలా ప్యాలెస్‌ లో శర్వానంద్ - రక్షితల వివాహం కుటుంభ సభ్యులు, రిలేటివ్స్, స్నేహితులు, సినీ ప్రముఖుల మధ్యన అంగరంగ వైభవంగా  జరగనుంది. అయితే నిశ్చితార్ధానికి-పెళ్ళికి ఇంతగా గ్యాప్ రావడానికి కారణం శర్వానంద్ కొత్త సినిమా షూటింగ్. శ్రీరామ్ ఆదిత్య దర్శకత్వంలో రొమాంటిక్ కామెడీగా ఓ మూవీ చేస్తున్నాడు. ఈ చిత్రానికి సంబంధించిన 40 రోజుల బిజీ షెడ్యూల్‌ను లండన్ లో పూర్తి చేసి ప్రస్తుతం శర్వానంద్ హైదరాబాద్‌కు తిరిగి వచ్చాడు. ఇకపై పెళ్లి పనుల్లో శర్వా నిమగ్నం కానున్నాడు.