మ్యాడాక్ ఫిల్మ్స్‌తో కృతి సనన్ హ్యాట్రిక్ కాంబినేషన్!
Kriti Sanon Teams Up With Maddock Films for Third Time
బాలీవుడ్ స్టార్ నటి కృతి సనన్ `మిమి`, `స్త్రీ` వంటి విజయవంతమైన చిత్రాలను అందించిన ప్రముఖ నిర్మాణ సంస్థ మ్యాడాక్ ఫిల్మ్స్ తో మరోసారి చేతులు కలిపారు. గతంలో మ్యాడాక్ బ్యానర్‌లో కృతి చేసిన `మిమి` చిత్రానికి ఆమె జాతీయ ఉత్తమ నటి అవార్డును గెలుచుకున్న విషయం తెలిసిందే. అయితే ఈసారి కాంబినేషన్ పూర్తిగా సరికొత్త జానర్‌ను ఎంచుకుని భారీ స్థాయి ఔట్-అండ్-ఔట్ హారర్ చిత్రాన్ని తెరకెక్కించేందుకు సిద్ధమవుతోంది.
ఇప్పటికే మ్యాడాక్ ఫిల్మ్స్ హారర్-కామెడీ యూనివర్స్‌లో భాగంగా `స్త్రీ`, `భేడియా`, `ముంజ్యా` వంటి సూపర్ హిట్ చిత్రాలను రూపొందించింది. కాగా కృతి సనన్‌తో నిర్మించబోయే ఈ నూతన చిత్రం హారర్-కామెడీ కాకుండా పూర్తి స్థాయి భయానక వాతావరణంతో హారర్ థ్రిల్లర్‌గా రాబోతోందని తెలుస్తోంది. ఇప్పటివరకు గ్లామరస్ .. ఎమోషనల్ పాత్రల్లో అలరించిన కృతి ఈ చిత్రంతో సరికొత్త నటనను ప్రేక్షకులకు పరిచయం చేయనున్నారు.
త్వరలోనే సినిమా టైటిల్, దర్శకుడు , ఇతర నటీనటుల వివరాలను అధికారికంగా ప్రకటించనున్నట్లు సమాచారం. నటనకు ప్రాధాన్యం ఉన్న విభిన్నమైన కథలను ఎంచుకునే కృతి సనన్.. మ్యాడాక్ ఫిల్మ్స్‌తో కాంబినేషన్ పునరావృతం చేస్తుండటంతో సినిమాపై అభిమానుల్లోనూ భారీ అంచనాలు నెలకొన్నాయి.
