ఆస్కార్ బరిలోకి సుహాస్ సినిమా?
Could Suhas’ Mandadi Enter the Oscars Race
భారతీయ చిత్రసీమ సుదీర్ఘ చరిత్రలో ఎన్నో అద్భుతమైన సినిమాలు ఆస్కార్ బరిలోకి వెళ్లినా `ఉత్తమ విదేశీ చిత్రం` కేటగిరీలో ఇప్పటివరకు మనకు ప్రధాన పురస్కారం దక్కలేదనే లోటు మిగిలే ఉంది. ఆర్.ఆర్.ఆర్ సాధించిన ఒరిజినల్ సాంగ్ అవార్డు దేశానికి గర్వకారణమే అయినా.. ఒక సినిమా కథాత్మకంగా సాధించే సంపూర్ణ ఆస్కార్ గౌరవం ఇంకా మిగిలే ఉంది. అయితే ఈ కల నెరవేరే సత్తా తన ఆత్మీయ మిత్రుడు సుహాస్ నటించిన తాజా చిత్రం `మందాడి`కి ఉందంటూ దర్శకుడు శివ నిర్వాణ చేసిన వ్యాఖ్యలు ఇప్పుడు సినీ వర్గాల్లో తీవ్ర ఆసక్తిని రేకెత్తిస్తున్నాయి. కోలీవుడ్ కథానాయకుడు సూరి `ముత్తుకాళి`గా, సుహాస్ `పులి` అనే పవర్ఫుల్ విలన్ పాత్రలో నటించిన ఈ పాన్-ఇండియా చిత్రం ప్రీ-రిలీజ్ వేడుకలో శివ నిర్వాణ మాట్లాడుతూ.. వేదికపైకి రాగానే మాటలు రానంతగా ఎమోషనల్ అయ్యానని.. జి.వి. ప్రకాష్ కుమార్ సంగీతం, గాయకుడు అభినవ్ స్వరాలు తనను ఎంతగానో కట్టిపడేశాయని పేర్కొన్నారు.
నడిసముద్రం, మత్స్యకారుల రేసింగ్ నేపథ్యంతో రూపుదిద్దుకున్న ఈ చిత్రాన్ని దర్శకుడు మధిమారన్ ఏమాత్రం గ్రీన్ మ్యాట్ లేదా చీటింగ్ షాట్స్ వాడకుండా.. ఒరిజినల్ లొకేషన్లలో నటీనటుల రక్తస్వేదాలతో అత్యంత నిజాయితీగా తెరకెక్కించారని కొనియాడారు. గరుడన్, విడుదల-1 చిత్రాలతో అజేయమైన ప్రయాణాన్ని కొనసాగిస్తున్న సూరి విలక్షణతను, `మజిలీ`తో పరిచయమై `కలర్ ఫోటో`తో జాతీయ స్థాయికి ఎదిగిన సుహాస్ నటనా విశ్వరూపాన్ని చూసి తాను అబ్బురపడ్డానని తెలిపారు. ఆర్.ఎస్. ఇన్ఫోటైన్మెంట్ పతాకంపై ఎల్.రెడ్ కుమార్ నిర్మించి, వెట్రిమారన్ క్రియేటివ్ ప్రొడ్యూసర్గా వ్యవహరించిన ఈ సముద్ర తీర దృశ్యకావ్యం.. ప్రేక్షకులు కొనే ప్రతి టికెట్కు న్యాయం చేస్తూ జాతీయ పురస్కారాలతో పాటు ఏకంగా ఆస్కార్ స్థాయి వరకు వెళ్లినా ఆశ్చర్యపోనవసరం లేదని శివ నిర్వాణ ధీమా వ్యక్తం చేశారు.
