62వ జాతీయ చలన చిత్ర అవార్డులు :
ఫంక్షన్‌కి స్టార్‌ గ్లామర్‌ అద్దే ప్రయత్నం జరగలేదు; ఓటు బ్యాంకు - పొలిటికల్‌ ఈక్వేషన్సు కనిపించలేదు. భారతీయ న్యాయ వ్యవస్థని వ్రేలెత్తి చూపుతూ మరాఠీ - హిందీ - గుజరాతీ - ఇంగ్లీషు భాషలలో నిర్మించిన ‘కోర్ట్‌’ ఉత్తమ చిత్రంగా; మణిపూర్‌కు చెందిన బాక్సింగ్‌ ఛాంపియన్‌ మేరీకోమ్‌ జీవితం ‘మేరీకోమ్‌’ బెస్ట్‌ పాపులర్‌ ఫిలిమ్‌గా, ట్రాన్స్‌ జెండర్‌గా నటించిన కన్నడ నటుడు ‘సంచారి విజయ్‌’ ఉత్తమ నటుడుగా (కన్నడ చిత్రం : ‘నాన్‌ అవనల్ల అవళు’) ఉత్తమ నాయికగా ‘క్వీన్‌’ కంగనా రనౌత్‌, ఉన్ని కృష్ణ కుమార్తె చిన్నారి ఉత్తర ఉన్ని కృష్ణ తొలిపాటకు జాతీయ అవార్డు దక్కాయి. ఈ అవార్డుల ఎంపికలో వైవిధ్యం వుంది; నిజాయితీ వుంది; ట్రాన్స్‌ పెరెన్సీ వుంది!
ప్రాంతీయ ఉత్తమ చిత్రంగా ఎంపికయ్యే అర్హతవున్న చిత్రంలేని ప్రాంతీయ సినిమాలున్నాయి. కానీ భారతీయ భాషలలో అత్యధిక చిత్రాలను అందిస్తున్న తెలుగుకి ఆ దుర్దశలేదు : ప్రవీణ్‌ సత్తారు ‘‘చందమామ కథలు’’ ఉత్తమ తెలుగు చిత్రంగా ఎంపికయింది; ఇదే సమయంలో ‘సినిమా రంగంపై ఉత్తమ రచన’ విభాగంలో పసుపులేటి పూర్ణ చంద్రరావు ‘‘సైలెంట్‌ సినిమా’’ అవార్డుకి ఎంపిక కావడం గర్వకారణం.
‘చందమామ కథలు’ సినిమా తీయడానికి - విడుదల చేయడానికి దర్శక నిర్మాత సత్తారు చాలా కష్టపడ్డారు. ఉన్నదంతా ఊడ్చిపెట్టారు. ఇటువంటి ప్రయోజనాత్మక, ప్రయోగాత్మక చిన్న సినిమాని ప్రభుత్వాలు ఆదుకోవాలి; సినీ పరిశ్రమ ప్రోత్సహించాలి! ఈ తరహా సినిమాలు బతికితేనే జాతీయ చిత్ర పటంలో తెలుగు సినిమా రెపరెపలాడుతుంది.
సానియామీర్జా, సింధు, కశ్యప్‌ వగైరా క్రీడాకారులకు భూరి బహుమానాలిచ్చి ప్రోత్సహించిన కెసిఆర్‌ జాతీయ బహుమతికి ఎంపికయిన ఈ ‘‘చందమామ కథలు’’, ‘‘సైలెంట్‌ సినిమా’’ని ఏ విధంగా ప్రోత్సహిస్తారో చూద్దాం! ఇదే సందర్భంలో ఉత్తమ ప్రాంతీయ చిత్రంగా ఎంపికైన ‘‘చందమామ కథలు’’ యూనిట్‌కి తెలుగు పరిశ్రమ అభినందనలు అందజేయకపోవడం బాధాకరం!
Loading..