ఎన్టీఆర్ నీల్ కాంబో మరో సునామి

ప్రశాంత్ నీల్ ఎన్టీఆర్ కాంబినేషన్ లో తెరకెక్కుతున్న భారీ సినిమా ఈ రోజు అధికారికంగా ప్రారంభమైంది. ఈ సందర్భంగా చిత్రబృందం ఒక స్టిల్ ను విడుదల చేసింది. ఆ స్టిల్ చూస్తే ప్రశాంత్ నీల్ తనదైన స్టైల్ ను కొనసాగిస్తున్నట్టు స్పష్టమవుతోంది. సాధారణంగా ఆయన సినిమాల్లో బ్లాక్ లేదా గ్రే టింట్ ఎక్కువగా కనిపించడం తెలిసిందే. ఈ స్టిల్ లోనూ అలాంటి వాతావరణమే కనిపించింది. ఒక వింటేజ్ అంబాసిడర్ కారు, రోడ్డుపై కొన్ని సైకిళ్లు, అలాగే అక్కడ అలజడి జరిగినట్టు కనిపించే కొన్ని విజువల్స్ ఉన్నాయి. దీంతో ఈ సినిమా కథకు సంబంధించిన ఆసక్తి మరింత పెరిగింది.

విశ్వసనీయ సమాచారం ప్రకారం ఈ సినిమా కథ 1960ల కాలానికి చెందినదని తెలుస్తోంది. పూర్తి సినిమా అదే కాలంలోనే నడవనుందని, మోడరన్ ఎలిమెంట్స్ ఉండకపోవచ్చని చెబుతున్నారు. ముఖ్యంగా 1960ల్లో బెంగాల్ పరిణామాల ఆధారంగా ఈ కథను రూపొందించినట్టు సమాచారం. ప్రశాంత్ నీల్ గత సినిమాల్లో కూడా ఒక స్ట్రాంగ్ బ్యాక్‌డ్రాప్ ను తీసుకుని కథను అద్భుతంగా చెప్పిన విషయం తెలిసిందే. ఇప్పుడు కూడా అలాంటి ఓ ఇంటెన్స్ కథను తెరపై చూపించబోతున్నారని అర్థమవుతోంది.

ఈ సినిమా విజువల్ ప్రెజెంటేషన్ పూర్తిగా 1960ల కాలానికి అనుగుణంగా ఉండాల్సిన అవసరం ఉంది. ఎన్టీఆర్ లుక్, గెటప్ కూడా ఆ కాలాన్ని ప్రతిబింబించేలా ప్రత్యేకంగా డిజైన్ చేస్తారని అంచనా. 1960ల కలకత్తా వాతావరణాన్ని ఒరిజినల్ గా చూపించాలంటే భారీ సెట్స్ వేసే అవకాశం ఉంది. గతంలో నాని నటించిన శ్యామ్ సింగ రాయ్ సినిమా కూడా వింటేజ్ కలకత్తా బ్యాక్‌డ్రాప్ లో తెరకెక్కి ప్రేక్షకుల మెప్పును పొందింది. ఇప్పుడు ఎన్టీఆర్ కూడా అలాంటి కథలో నటించబోతుండటం సినీ ప్రియులకు మళ్ళీ కొత్త ఉత్సాహాన్ని తెచ్చిపెడుతోంది.

ఇప్పటి వరకు కలకత్తా బ్యాక్‌డ్రాప్ తో వచ్చిన తెలుగు సినిమాలు దాదాపు హిట్ అయ్యాయి. అలాంటి నేపథ్యంలో ఎన్టీఆర్ ప్రశాంత్ నీల్ కాంబినేషన్ లో రాబోయే ఈ సినిమా పై భారీ అంచనాలు నెలకొన్నాయి. ప్రశాంత్ నీల్ స్టైల్ కి ఎన్టీఆర్ ఎనర్జీ కలిస్తే ఈ సినిమా ఇంకెంత స్థాయికి వెళ్తుందో చూడాలి. పూర్తి వివరాలు రాబోయే రోజుల్లో మరింత స్పష్టమవుతాయి.