‘ప్రతిరోజూ పండగే’ షూటింగ్ పూర్తయింది

సుప్రీం హీరో సాయి తేజ్, రాశి ఖన్నా హీరోహీరోయిన్లుగా మారుతి దర్శకత్వంలో ప్రముఖ నిర్మాత అల్లు అరవింద్ సమర్పిస్తున్న చిత్రం ‘ప్రతిరోజూ పండగే’. గీతాఆర్ట్స్, యూవీ క్రియేషన్స్ బ్యానర్లలో రూపుదిద్దుకుంటున్న ఈ చిత్రానికి బన్నీ వాస్ నిర్మాత. ఈ చిత్రాన్ని డిసెంబర్ 20న విడుదల చేసేందుకు నిర్మాతలు సన్నాహాలు చేస్తున్నారు. ఈ చిత్రంలోని మైండ్ బ్లోయింగ్ డాన్స్ నెంబర్ సాంగ్ అన్నపూర్ణ స్థూడియోస్‌లో వేసిన గ్రాండ్ సెట్లో చిత్రీకరణజరుపుకుంటోంది. ప్రొడక్షన్ డిజైనర్ రవీందర్ అద్భుతమైన థీమ్, కలర్ ప్యాట్రన్‌లో సెట్ వేశారు. లేటెస్ట్ మ్యూజిక్ సెన్సేషన్ థమన్ సంగీతమంచిన ఈ ఎనెర్జిటిక్ సాంగ్ కోసం సెన్సేషనల్ కొరియోగ్రాఫర్ శేఖర్ మాస్టర్ నృత్య రీతులు సమకూరుస్తున్నారు. శ్రీ జో ఈ పాటకు సాహిత్యం అందించారు. నవంబర్ 30 రాశి ఖన్నా పుట్టిన రోజు సందర్భంగా ఏర్పాటు చేసిన విలేకరుల సమావేశంలో...

ఏస్ ప్రొడ్యూసర్ అల్లు అరవింద్ మాట్లాడుతూ.. ‘‘గీతాఆర్ట్స్, యూవీ క్రియేషన్స్ కలిసి గతంలో ‘భలే భలే మగాడివోయ్’ సినిమా తీశాం. అది బ్రహ్మాండమైన సక్సెస్ సాధించింది. దాని తర్వాత మళ్ళీ అదే టీమ్ కలిసి చేస్తోన్న చిత్రం ‘ప్రతిరోజూ పండగే’. దర్శకుడు మారుతికి ఒక ప్రత్యేకమైన స్టైల్ ఉంది. ఒక సినిమాని ఎక్కడా బోర్ కొట్టకుండా సరదాగా తీసుకెళ్లి మనకు తెలియకుండా మంచి మెస్సేజ్‌ని మనలో ఎక్కించే నేర్పరితనం ఉండే బహుకొద్ది మందిలో మారుతి ప్రథమ శ్రేణిలో ఉంటారు. ఈ సినిమా కథ ముఖ్యంగా ఎన్‌ఆర్‌ఐ గురించి చెప్పిన స్టోరీ. ఇక్కడ ఉన్న వారితో కనెక్ట్ కాకుండా ఎలా ఇబ్బందిపడుతున్నారు అనేది ఈ సినిమాలో చూపించారు. చాలా కాలం నుండి సాయితో సినిమా చేద్దాం అనుకున్నాం కానీ ఇప్పుడు కుదిరింది. అలాగే రాశితో కూడా అలానే కుదిరింది. రాశి క్యారెక్టర్ చాలా బాగుంటుంది. తనతో 2020లో కూడా ఓ సినిమా ప్లాన్ చేస్తున్నాం’’ అన్నారు.

డైరెక్టర్ మారుతి మాట్లాడుతూ.. ‘‘భలే భలే మగాడివోయ్ చిత్రంతో ఈ రెండు బేనర్స్ ని కలిపాను. అరవింద్‌గారి ప్రొడక్షన్‌లో సినిమా తీస్తున్నప్పుడు ప్రతి షాట్‌కి ఇది అరవింద్‌గారి సినిమా వొళ్ళు దగ్గర పెట్టుకొని తీయాలి అనే భాద్యత అరవింద్ గారు మాకు  నపడక పోయినా ఆయన ఇన్ఫ్లుయన్స్ మాత్రం మా అందరిలో ఉంటుంది. నాకు వచ్చిన ఒక థాట్ ను అరవింద్ గారు ఇచ్చిన నమ్మకంతో ఇంకొంచెం ముందుకు తీసుకువెళ్లగలిగాను. గీతా ఆర్ట్స్‌లో ఎన్నో మంచి మంచి ఫ్యామిలీ ఎంటర్టైనర్స్ వచ్చాయి. అలాంటి ఒక రెస్పాన్సిబుల్ ఫిలిం ప్రతిరోజూ పండగే. ఈ సినిమాకి సత్యరాజ్ గారు ప్రాణం పోశారు అని చెప్పొచ్చు. అలాగే రవిశంకర్ గారు ఈ సినిమాని ప్రేమించి సత్యరాజ్ గారికి వాయిస్ ఇవ్వడం జరిగింది. ప్రతి టెక్నీషియన్ ఈ సినిమాను ఓన్ చేసుకొని వర్క్ చేశారు. వంశి, వాసు పర్ఫెక్ట్‌గా నన్ను జడ్జ్ చేస్తూ వచ్చారు. థమన్ అద్భుతమైన మ్యూజిక్ ఇచ్చారు. జయ కుమార్ విజువల్ కొత్తగా ఉంటాయి. రాశి సింపుల్‌గా ఉండే బబ్లీ అమ్మాయి క్యారెక్టర్ ప్రతి ఒక్కరికీ ఆమె క్యారెక్టర్ కనెక్ట్ అవుతుంది. ఈరోజుతో సాంగ్ పూర్తయింది. డిసెంబర్ 20న సినిమా రిలీజ్ అవుతుంది. అన్ని ఏజ్ గ్రూప్‌ల వారు ఎంజాయ్ చేస్తారు. ఫుల్ మీల్స్ భోజనం‌లా ఉంటుంది. ఎంటర్టైన్మెంట్ గా ఉంటూనే మంచి మెసేజ్ కూడా ఉంటుంది’’ అన్నారు.

థమన్ మాట్లాడుతూ.. ‘‘చాలా హార్ట్ టచింగ్ స్క్రిప్ట్. మారుతి ఈ సినిమాతో వెరీ బిగ్ హిట్ ఇవ్వబోతున్నాడు. సినిమా మంచి మ్యూజిక్ కోసం హంగ్రీగా ఉంది. సినిమా బాగుంటే కానీ మంచి మ్యూజిక్ అడగదు. అలాగే మంచి ఆర్ఆర్ కుదిరింది. మారుతి ఈ కథ చెప్పనప్పుడే మమ్ములనందరిని కదిలించింది. మారుతి ఈ సినిమా ద్వారా తేజ్ కి, నాకు పెద్ద సక్సెస్ ఇవ్వబోతున్నందుకు హ్యాపీగా ఉంది. అందరినీ ఎమోషనల్‌గా కదిలిస్తుందీ సినిమా. ఈ అవకాశం ఇచ్చిన అరవింద్‌గారికి, మారుతిగారికి ధన్యవాదాలు’’ అన్నారు.

రాశి ఖన్నా మాట్లాడుతూ.. ‘‘ఈరోజుతో షూటింగ్ పూర్తయింది. ప్రతి సినిమా షూటింగ్ అయిపోగానే అందరం బాధపడతాం. కానీ ఈ సినిమాకి అందరం హ్యాపీ మోడ్‌లో ఉన్నాం. ఈ సినిమా నాకు ఒక బెస్ట్ ఎక్స్పీరియన్స్. యూవీలో జిల్ సినిమా చేశాను. చాలా మంచి ప్రొడక్షన్ హౌస్. అలాగే ఎప్పటినుండో గీతా ఆర్ట్స్ లో వర్క్ చేయాలి అనుకుంటున్నా ఇప్పుడు కుదిరింది. మారుతి గారు చాలా క్లారిటీతో తీశారు. ఈ సినిమాలో నా క్యారెక్టర్ మీ అందరికి కనెక్ట్ అవుతుంది. సాయి నైస్ కో స్టార్’’ అన్నారు.

సాయి తేజ్ మాట్లాడుతూ.. ‘‘గీతా ఆర్ట్స్, యువి క్రియేషన్స్ లో ఎప్పటినుండో సినిమా చేయాలి అనేది నా కోరిక. వారిద్దరూ కలిసి చేస్తున్న ప్రాజెక్ట్ ‘ప్రతిరోజూ పండగే’. అరవింద్ గారు నేను ఇండస్ట్రీకి వచ్చినప్పటినుండి సపోర్ట్ చేస్తూ వస్తున్నారు. చాలా మంచి సినిమా. ప్రతి ఒక్కరూ నా క్యారెక్టర్‌తో కనెక్ట్ అవుతారు. అలాగే సత్యరాజ్‌గారి క్యారెక్టర్‌కి కూడా మంచి ఇంపార్టెన్స్ ఉంటుంది. థమన్ బ్యూటిఫుల్ మ్యూజిక్ ఇచ్చారు. రాశి క్యారెక్టర్ ఫన్నీగా ఉంటుంది. మారుతిగారి స్పీడ్ ని మ్యాచ్ చేస్తూ జయ కుమార్ బ్యూటిఫుల్ విజువల్స్  ఇచ్చారు. ఇంతమంది ఆర్టిసులని కలిపి ఒక మంచి సినిమా తీసిన మారుతిగారికి థాంక్స్. మా సినిమా నుండి మూడో పాట విడుదలవుతుంది. మీ అందరికి తప్పకుండా  నచ్చుతుంది అనుకుంటున్నా’’ అన్నారు.

శేఖర్ మాస్టర్ మాట్లాడుతూ.. ‘‘భలే భలే మగాడివోయ్ తర్వాత గీతా ఆర్ట్స్, యువి క్రియేషన్స్‌లో నేను చేస్తున్న సినిమా. ఈ అవకాశం ఇచ్చిన దర్శక నిర్మాతలకి థాంక్యూ’’ అన్నారు.

నటీనటులు:

సాయి తేజ్, రాశి ఖన్నా, సత్యరాజ్, విజయ కుమార్, రావు రమేష్, మురళీ శర్మ, అజయ్, ప్రవీణ్, శ్రీకాంత్ అయ్యంగార్, సత్యం రాజేష్, సత్య శ్రీనివాస్, సుభాష్, భరత్ రెడ్డి, గాయత్రీ భార్గవి, హరితేజ, మహేష్, సుహాస్ తదితరులు

సాంకేతిక వర్గం

రచన, దర్శకత్వం – మారుతి

సమర్పణ – అల్లు అరవింద్

ప్రొడ్యూసర్ – బన్నీ వాస్

కో ప్రొడ్యూసర్ – ఎస్.కె.ఎన్

మ్యూజిక్ డైరెక్టర్ – తమన్.ఎస్

ఎడిటర్ – కోటగిరి వెంకటేశ్వర రావ్ (చంటి)

ఆర్ట్ డైరెక్టర్ – రవీందర్

ఎగ్జిక్యూటివ్ ప్రొడ్యూస‌ర్ – బాబు

డిఓపి – జయ కుమార్

పీఆర్ఓ – ఏలూరు శ్రీను

పబ్లిసిటీ డిజైనర్ – అనిల్ భాను