మరోసారి డర్టీ డర్టీ గా.....! మరోసారి డర్టీ డర్టీ గా.....!

బాలీవుడ్‌ సంచలన నటి విద్యాబాలన్‌ నటించిన 'డర్టీ పిక్చర్‌' ఎంత పెద్దహిట్‌ అయిందో అందరికీ తెలిసిందే. కాగా పెద్ద హిట్‌ అయినప్పటికీ ఈ చిత్రం డర్టీగా ఉందనే విమర్శలు వచ్చాయి. తాజాగా ఆమె నటిస్తున్న చిత్రం మరింత డర్టీగా ఉండనుందని అంటున్నారు. ప్రస్తుతం నేషనల్‌ అవార్డు విన్నర్‌ అయిన ప్రముఖ బెంగాలీ దర్శకుడు శ్రీజిత్‌ ముఖర్జీ బెంగాళీలో తీసిన 'రాజ్‌కహాని' కి రీమేక్‌గా ఓ చిత్రం రూపొందుతోంది. ఈ చిత్రం ద్వారా శ్రీజిత్‌ ముఖర్జీ బాలీవుడ్‌ ఎంట్రీ ఇవ్వనుండటం విశేషం. కాగా ఈ చిత్రం బాలీవుడ్‌లో 'బేగమ్‌జాన్‌' అనే పేరుతో రూపొందుతోంది. తాజాగా విడుదలైన ఈ చిత్రం ఫస్ట్‌లుక్‌లో విద్యా హుక్కా తాగుతున్న ఫొటో ఇప్పుడు ఇంటర్నెట్‌లో హల్‌చల్‌ చేస్తోంది. 1947 ప్రాంతంలో అంటే దేశవిభజన జరిగే సమయంలో పంజాబ్‌లో వేశ్యగృహాన్ని నడిపే బేగమ్‌జాన్‌గా విద్యా నటిస్తోంది. ఈ చిత్రాన్ని మార్చిలో విడుదల చేయనున్నారు. మరి ఈ చిత్రంతో విద్యా మరోసారి హాట్‌టాపిక్‌గా మారనుందని బాలీవుడ్‌ విశ్లేషకులు బల్ల గుద్ది చెబుతున్నారు. కొంతకాలంగా హిట్‌లేని విద్యాబాలన్‌కు ఈ చిత్రం మునుపటి వైభవం తెస్తుందని ఆమె అభిమానులు సంతోషపడుతున్నారు.