న్యూ ఇయర్ లో మహేష్ హంగామా..!

ప్రస్తుతం దక్షిణాదిలో రూపొందుతున్న చిత్రాలలో అత్యంత ప్రతిష్టాత్మకంగా భావించి అందరూ ఆసక్తిగా ఎదురుచూస్తున్న చిత్రం టాలీవుడ్‌ సూపర్‌స్టార్‌ మహేష్‌బాబు, దక్షిణాది టాప్‌ డైరెక్టర్‌ మురుగదాస్‌ల కాంబినేషన్‌లో రూపొందుతున్న చిత్రం అనే సంగతి తెలిసిందే. ఈ చిత్రంతో మహేష్‌ కోలీవుడ్‌లోకి కూడా డైరెక్ట్‌గా ఎంట్రీ ఇస్తుండటం, మహేష్‌ కెరీర్‌లోనే భారీ బడ్జెట్‌తో రూపొందుతున్న చిత్రం కావడం వంటివి ఈ చిత్రంపై ఆసక్తిని రేకెత్తిస్తున్నాయి. కాగా ఇప్పటివరకు ఈ చిత్రం టైటిల్‌తో పాటు ఏ విషయం కూడా బయటకు లీక్‌ కాకుండా దర్శకనిర్మాతలు ఎంతో జాగ్రత్త వహిస్తూ వస్తున్నారు. ఈ చిత్రానికి తమిళ, తెలుగు భాషల్లో ఒకే టైటిల్‌ పెట్టాలని, అది కూడా తమిళనాడులో ఉన్న తమిళ పేరు గల చిత్రాలకు ఉన్న రాయితీలను ఉపయోగించుకునేలా ఆ టైటిల్‌ ఉండాలని మురుగదాస్‌ భావిస్తున్నాడు. అందుకే హీరో క్యారెక్టర్‌ పేరుతో రెండు భాషలకు సెట్‌ అయ్యే టైటిల్‌ కోసం కుస్తీ పడుతున్నాడు. కాగా ఈ చిత్రం టైటిల్‌ను, లోగోను కొత్త ఏడాది కానుకగా జనవరి 1న విడుదల చేయనున్నారని సమాచారం. అదే సమయంలో ఈ చిత్రం ఫస్ట్‌లుక్‌ని రిపబ్లిక్‌డే కానుకగా జనవరి 26న తెలుగు, తమిళభాషల్లో ఒకేసారి విడుదల చేయడానికి సన్నాహాలు జరుగుతున్నాయని తెలుస్తోంది.