'ఎన్టీఆర్‌' క్రేజ్ ని వాడుకుంటారంట!

ప్రస్తుతం 'జనతాగ్యారేజ్‌' చిత్రం సృష్టిస్తున్న కలెక్షన్ల సునామీతో ఎన్టీఆర్‌ మహదానందంగా ఉన్నాడు. ఎన్నో ప్రతికూల పరిస్దితులను ఎదుర్కొని కూడా ఈ చిత్రం అదిరిపోయే కలెక్షన్లతో బాక్సాఫీస్‌ వద్ద సంచలనం సృష్టిస్తోంది. 'బాహుబలి' తర్వాత అతి తక్కువ సమయంలో 100 కోట్లు వసూలు చేసిన చిత్రంగా 'జనతాగ్యారేజ్‌' నిలిచింది. ఈ ఒక్క సినిమాతో ఎన్టీఆర్‌కు ఉన్న క్రేజ్‌ రెండింతలు పెరిగిందంటే అతిశయోక్తికాదు. దీంతో ఇంతకాలం కేవలం తన తమ్ముడు ఎన్టీఆర్‌తో నిర్మాతగా ఓ చిత్రం చేయాలని భావిస్తున్న ఆయన అన్నయ్య నందమూరి కళ్యాణ్‌రామ్‌ ఇప్పుడు పూరీతో కలిసి ఎన్టీఆర్‌ క్రేజ్‌ను వాడుకోవాలని డిసైడ్‌ అయ్యారని సమాచారం. నందమూరి కళ్యాణ్‌రామ్‌ హీరోగా, నిర్మాతగా ప్రస్తుతం పూరీజగన్నాథ్‌తో కలిసి 'ఇజం' చిత్రం చేస్తున్నాడు. ఇటీవల విడుదలైన ఈ చిత్రం పోస్టర్స్‌, టీజర్స్‌ అందరినీ ఆకట్టుకుంటున్నాయి. కాగా ఈ చిత్రంలో తన తమ్ముడు ఎన్టీఆర్‌ను ఓ గెస్ట్‌రోల్‌ చేయించాలని కళ్యాణ్‌రామ్‌తో పాటు పూరీ జగన్నాథ్‌ కూడా ప్లాన్‌ చేస్తున్నాడు. ఈ చిత్రంలో తన తమ్ముడు కూడా కనిపిస్తే ఇప్పుడు ఆయనకున్న ఇమేజ్‌ చిత్రం మైలేజ్‌కి బాగా కలిసొస్తుందని కళ్యాణ్‌రామ్‌, పూరీలు భావిస్తున్నారు. మరి వీరి మాటలను ఎన్టీఆర్‌ ఒప్పుకుంటాడో లేదో వేచిచూడాల్సివుంది.