'కబాలి' మూవీ లీక్..నిర్మాత అప్రమత్తం!

ఎటువంటి సినిమా అయినా విడుదల అయిన కొన్ని గంటలకే పైరసీ రూపం లో బయటికొచ్చేస్తుంది. ఎంతో కష్టపడి నిర్మాతలు, దర్శకులు సినిమాలను తెరకెక్కిస్తుంటే విడుదలకు ముందు, విడుదలైన తరువాత ఈ పైరసీ భూతం వెంటాడుతోంది. అసలు ఈ పైరసీ మీద ఎంతమంది ఫైట్ చేసినా ఉపయోగం లేకుండా పోయింది. ఆ మధ్య పవన్ నటించిన 'అత్తారింటికి దారేది' విడుదలకు ముందే లీకై యూట్యూబ్ లో దర్శనమిచ్చింది. నిర్మాతలు కంగారు పడి ఆ సినిమాను వెంటనే విడుదల చేశారు. అయితే ఆ సినిమా ఇండస్ట్రీ హిట్ అయ్యి పైరసీ అయినా నిర్మాతలు సేఫ్ అయ్యారు. మరి ఇంకా చాలా సినిమాలకు ఈ పైరసీ భూతం చుక్కలు చూపిస్తోంది. నిన్నగాక మొన్న 'ఉడ్తా పంజాబ్ , సుల్తాన్' వంటి సినిమాలను కూడా ఈ పైరసీ భూతం పట్టి పీడించింది. అసలీ సోదంతా ఎందుకు అనుకుంటున్నారా. అదే రజినీకాంత్ తాజాగా నటించిన 'కబాలి' కూడా లీక్ అయ్యిందని అంటున్నారు. ఈ సినిమాను నిర్మాత కలైపులి దాదాపు 100 కోట్ల బడ్జెట్ తో నిర్మించాడు. ఇప్పటికే వాయిదాల మీద వాయిదాలు పడుతూ ఎట్టకేలకు జులై  22 న సినిమా విడుదలకు సిద్ధమవుతున్న వేళ ఈ లీక్ విషయం నిర్మాతను కంగారు పుట్టించింది. సినిమా మొత్తం ఆన్ లైన్ లో లీకైందని ఈ విషయాన్ని వెంటనే గుర్తించిన నిర్మాత కలైపులి చెన్నై హైకోర్టు ను ఆశ్రయించారని సమాచారం. అయితే దాదాపు 180 సైట్ ల్లో తాము ఈ లింక్ ని గుర్తించామని... వెంటనే అవి స్ప్రెడ్ కాకుండా ఆపాలని... అలాగే ఆ సైట్ లో నుంచి లింక్స్ తొలిగించేలా చర్యలు తీసుకోవాలని కోర్టుని వేడుకున్నారు. మరి 'కబాలి' వంటి పెద్ద సినిమాల పరిస్థితే ఇలా ఉంటే చిన్న సినిమాల పరిస్థితి ఏమిటో కదా పాపం..!