ఆ ఎన్టీఆర్‌, ఈ ఎన్టీఆర్‌ గురించి లక్ష్మీపార్వతి!

సినిమా, రాజకీయరంగాలలో స్వర్గీయ ఎన్టీఆర్‌కు వారసుడిగా బాలకృష్ణను చెబుతారు. ఎన్టీఆర్‌ బతికున్నకాలంలో కూడా తన వారసుడు బాలయ్యే అని ప్రకటించాడు. ఇక జూనియర్‌ ఎన్టీఆర్‌ విషయానికి వస్తే ఈ తరం హీరోల్లో నందమూరి వారసుడిగా పేరు తెచ్చుకుంటూ మాంచి క్రేజ్‌ సంపాదించుకున్న ఘనత జూనియర్‌ ఎన్టీఆర్‌కు దక్కుతుంది. తాతయ్య నటన, రూపం ఎన్టీఆర్‌లో కనిపిస్తుంటాయని అందరూ ఆంటూ ఉంటారు. కానీ ఈ పోలికను ఎన్టీఆర్‌ సతీమణి లక్ష్మీపార్వతి కొట్టిపడేశారు. అంతేకాదు.. జూనియర్‌ ఎన్టీఆర్‌పై షాకింగ్‌ కామెంట్స్‌ చేశారు. ఇప్పటివరకు జూనియర్‌ని ఎవ్వరూ ఇంతలా టార్గెట్‌ చేయలేదంటే నమ్మశక్యం కాదు. ఓ టీవీ చానెల్‌కు ఇచ్చిన ఇంటర్వ్యూలో లక్ష్మీపార్వతి ఈ షాకింగ్‌ కామెంట్స్‌ చేయడం గమనార్హం. ఆమె మాట్లాడుతూ... ఎన్టీఆర్‌కు, జూనియర్‌ ఎన్టీఆర్‌కు పోలికా? ఇద్దరినీ పక్కన పక్కనపెట్టి చూస్తే ఎవ్వరూ ఆ మాటలు అనలేరు. ఆయన ఆజానుబాహుడు. ఈ కుర్రాడు అరజాన బాహుడు. ఇద్దరికీ నక్కకు, నాగలోకానికి ఉన్నంత తేడా ఉంది. ఒక్క జూనియర్‌ ఎన్టీఆరే కాదు.. ఆయన కొడుకులు, మనవళ్లలో ఎవ్వరికీ ఆయన పోలికలు, నటన రాలేదు అని కామెంట్‌ చేసింది. కానీ ఈ మాటలు చాలా దారుణమని, ఇప్పటికే తమ అందం, నటనతో బాలకృష్ణ, జూనియర్‌ ఎన్టీఆర్‌లు తెలుగు చలన చిత్ర పరిశ్రమలో వెలుగుతున్న విషయాన్ని చాలా మంది గుర్తుచేస్తూ లక్ష్మీపార్వతి వ్యాఖ్యలను అసందర్బంగా, కావాలని పనిగుట్టుకొని చేసిన విధంగా ఉన్నాయంటూ విమర్శలు చేస్తున్నారు.