భారీ రేటుకు 'సోగ్గాడు' అమ్మకం..!

తన తాజా చిత్రం 'సోగ్గాడే చిన్నినాయనా' చిత్రాన్ని జనవరి 15న విడుదలకు సిద్దం చేస్తున్న సంగతి తెలిసిందే. కాగా ఈ చిత్రాన్ని దాదాపు అన్ని ఏరియాల్లో నాగ్‌ స్వయంగా రిలీజ్‌ చేస్తున్నాడు. 'మనం' సినిమా మంచి విజయం సాధించి ఘనవిజయం సాధించినప్పటికీ నిర్మాతగా నాగ్‌కు మిగిలింది పెద్దగా లేదు. డిస్ట్రిబ్యూటర్లు సరైన లెక్కలు చూపించకుండా ఎగవేయడంతో ఈ చిత్రం అంత పెద్ద హిట్‌ అయినా నాగ్‌కు ఏమీ మిగలలేదు. దీన్ని దృష్టిలో ఉంచుకొని నాగే ఈ చిత్రాన్ని స్వయంగా రిలీజ్‌ చేయడానికి సిద్దం అవుతున్నాడు. మరో పక్క ఈ చిత్రం శాటిలైట్‌ రైట్స్‌ భారీ మొత్తానికి అమ్ముడుపోయాయి. నాగార్జున సినిమాలకు టీవీ మాధ్యమంలో మంచి క్రేజ్‌ ఉండటంతో ఈ చిత్రం శాటిలైట్‌ హక్కులను జెమిని చానెల్‌ 6.5కోట్లకు కొనుగోలు చేసినట్లు సమాచారం. కాగా త్వరలో నాగార్జున మహిళా దర్శకురాలు 'చంటిగాడు, లవ్‌లీ' వంటి చిత్రాలకు దర్శకత్వం వహించిన బి.ఎ.జయ దర్శకత్వంలో ఓ చిత్రం రూపొందనుందని, ఆమె డైరెక్షన్‌లో సినిమా చేయడానికి నాగ్‌ అంగీకరించాడని సమాచారం. ఇక 'సోగ్గాడే చిన్ని నాయనా' చిత్రానికి వస్తే.. ఇప్పటికే ఈ చిత్రంలో రమ్యకృష్ణ, లావణ్యత్రిపాఠి, అనసూయ, హంసానందిని వంటి భామలు నటిస్తున్నారు. తాజా సమాచారం ప్రకారం ఈ చిత్రంలో స్వీటీ అనుష్క కూడా ఓ అతిథి పాత్రలో కనిపించనుందని తెలుస్తోంది. వాస్తవానికి ఈ విషయాన్ని సినిమా రిలీజ్‌ అయ్యే వరకు గోప్యంగా ఉంచాలని నాగ్‌ భావించాడని సమాచారం. థియేటర్లలో అనుష్కను చూసి ప్రేక్షకులు థ్రిల్‌గా ఫీలవ్వాలని అనుకొన్నాడట నాగ్‌. కాగా ఆమె ఆల్‌రెడీ నాగ్‌ నటిస్తున్న మరో చిత్రం 'ఊపిరి'లో కూడా ఓ అతిథి పాత్రలో నటించిన సంగతి తెలిసిందే. నాగ్‌ చిత్రాల్లో అనుష్క అతిథి పాత్రల్లో మెరవడం విన్నవారు అనుష్క నాగ్‌ కోసం ఎంత చేసినా తక్కువే. ఎందుకంటే అనుష్కకి హీరోయిన్‌గా చాన్స్‌ ఇచ్చింది నాగార్జుననే కావడం అందుకు కారణం అంటున్నారు అక్కినేని అభిమానులు.