గుండెను పిండేస్తున్న ట్రైలర్! గుండెను పిండేస్తున్న ట్రైలర్!

ఎంతటి కరడుగట్టిన మనిషినైనా జాతీయతా భావంతో కొడితే ఇట్టే ద్రవించిపోతాడు. అందుకే మనమంతా భారతీయులం అని చాటిచెప్పే యునీక్ సినిమాలకు ఎప్పుడూ బ్రహ్మాండమైన గిరాకీ ఉంటుంది. ఆ కోవకే చెందిన హిందీ సినిమా ఎయిర్ లిఫ్ట్ ఇప్పుడు అంతటా చర్చనీయాంశం అయింది. నెల కిందట విడుదల చేసిన మొదటి ట్రైలర్, ఇదిగో ఇప్పుడొచ్చిన రెండో ట్రైలర్ గుండెను పిండేసేలాగా ఉంది. ఆగష్టు 2 1990లో కువైట్ పైన ఇరాక్ సేనలు దాడి చేసినప్పుడు అక్కడ బందీలుగా చిక్కుకున్న సుమారు ఒక లక్షా డెబ్బై వేల మంది భారతీయుల్ని ఇండియన్ ఆర్మీ సాయంతో 488 ఏరో ప్లేన్లు ఉపయోగించి 59 రోజుల్లో ఎయిర్ లిఫ్ట్ చేసిన ఓ యదార్థ సంఘటనకు దృశ్య రూపమే ఈ సినిమా. ఇందులో హీరో అక్షయ్ కుమార్ కువైట్ నగరంలో స్థిరపడిన ఓ సంపన్న వ్యాపారవేత్త రంజిత్ కాత్యాల్ పాత్రను పోషించాడు. రాజ కృష్ణ మీనన్ దర్శకత్వం వహించిన ఈ మూవీ ఈ నెల 22న విడుదల కానుంది. ప్రతి భారతీయుడు గర్వపడేలా, మనలోని ఐకమత్యాన్ని చాటేలా, భారతీయుడు ఎక్కడున్నా భారతీయుడే అని ప్రపంచం మొత్తం తలెత్తి సెల్యూట్ చేసేలా ఎయిర్ లిఫ్ట్ ఉండబోతుంది అన్నది ఈ మూడు నిమిషాల ట్రైలర్ చూస్తే స్పష్టమవుతుంది.