ఒక యావరేజ్ సినిమాకు ఇంత పోటీయా..!

కిందటేడాది కోలీవుడ్ లో సంక్రాంతి కానుకగా విడుదలైన విజయ్, మోహన్ లాల్ ల 'జిల్లా' చిత్రం అక్కడ కేవలం ఓ యావరేజ్ సినిమాగానే నిలిచింది. కానీ ఇప్పుడు ఈ చిత్రం రీమేక్ పై టాలీవుడ్ లో మంచి పోటీ ఏర్పడ్డం విడ్డూరంగా ఉంది. మనవారికి ఏది పట్టుకుంటే అదే పిచ్చి.. అన్నట్లుగా ఇప్పుడు ఈ చిత్రాన్ని రీమేక్ చేయడానికి పోటీపడుతున్నారు. వాస్తవానికి ఈ చిత్రాన్ని మెగా సూపర్ గుడ్ ఫిల్మ్స్ అధినేత ఆర్.బి.చౌదరి తమిళంలో నిర్మించాడు. ఇప్పుడు ఈ చిత్రాన్ని వెంకటేష్, రవితేజల కాంబినేషన్ లో మల్టీ స్టారర్ గా తీయాలనుకుంటునట్లు, వీరుపోట్ల దర్శకత్వం వహిస్తాడని వార్తలు వస్తున్నాయి. ఆర్.బి.చౌదరి చిత్రం కాబట్టి ఈ చిత్రం రీమేక్ రైట్స్ ను సురేష్ ప్రొడక్షన్స్ సంస్థ సులభంగా దక్కించుకోవచ్చు. కానీ మోహన్ లాల్, విజయ్ లు తండ్రికొడుకులుగా నటించినప్పుడు ఇక్కడ వెంకటేష్, రవితేజలకు ఆ ఏజ్ కాంబినేషన్ సరిగ్గా కనెక్ట్ కాదు. ఏజ్ గ్యాప్ పెద్దగా లేకపోవడంతో వెంకీ, రవితేజలకు ఈ చిత్రం సూట్ కాదని అంటున్నారు. ఇక మరోవంక ఈ చిత్రాన్ని ఇటీవలే బాలకృష్ణ చూసాడని, మోహన్ లాల్ పోషించిన పాత్రను బాలకృష్ణ, విజయ్ పోషించిన పాత్రను కళ్యాన్ రామ్ పోషించనున్నారని, వీరిద్దరూ నిజజీవితంలో కూడా బాబాయ్-అబ్బాయ్ లు కావడంతో ఈ సినిమాకు వీరిద్దరూ అయితే సరిగ్గా నప్పుతారని అంటున్నారు. కాగా సముద్ర ఈ చిత్రానికి దర్శకత్వం వహిస్తాడని, నందమూరి కళ్యాన్ రామ్ తన సొంతబేనర్ లో ఈ సినిమా చేస్తాడని వార్తలు వస్తున్నాయి. మొత్తానికి 'జిల్లా'ను రీమేక్ చేస్తే అది వెంకటేష్, రవితేజల కంటే బాలయ్య, కళ్యాన్ రామ్ లకే బాగా వర్కవుట్ అవుతుందని విశ్లేషకులు అభిప్రాయపడుతున్నారు.