సినీజోష్ రివ్యూ: రెబల్స్ అఫ్ తుపాకుల గూడెం

రెబల్స్ అఫ్ తుపాకుల గూడెం రివ్యూ

నటీనటులు: ప్రవీణ్ కండెల, జైత్రి మకానా, శివరామ్ రెడ్డి, శ్రీకాంత్ రాథోడ్ తదితరులు

సంగీతం: మణి శర్మ

సినిమాటోగ్రఫీ: శ్రీకాంత్ ఏర్పుల

నిర్మాత: వారాధి క్రియేషన్స్ ప్రైవేట్ లిమిటెడ్

దర్శకుడు: జైదీప్ విష్ణు

జైదీప్ విష్ణు దర్శకత్వంలో శ్రీకాంత్ రాథోడ్ మరియు జైత్రి మకానా ప్రధాన జంటగా నటించిన రెబెల్స్ ఆఫ్ తుపాకుల గూడెం మంచి ప్రమోషన్స్ తో ఈరోజు థియేటర్లలో విడుదలైంది. నక్సల్స్ బ్యాగ్డ్రాప్ లో తెరకెక్కిన ఈ చిత్రం ప్రేక్షకులని ఏమేర ఆకట్టుకుందో చూసేద్దాం.

కథ:

2009 కాలంలో సమాజం నుండి నక్సలిజాన్ని నిర్మూలించడానికి కేంద్ర ప్రభుత్వం ఒక పథకాన్ని తీసుకువస్తుంది. అందులో భాగంగానే జీవన స్రవంతిలోకి తిరిగి రావడానికి సిద్ధంగా ఉన్న నక్సలైట్లకు ప్రభుత్వం పోలీసు ఉద్యోగాలు మరియు మూడు లక్షల రివార్డును అందిస్తుంది. ఆ అవకాశాన్ని క్యాష్ చేసుకోవడానికి తుపాకుల గూడెం అనే చిన్న గ్రామానికి చెందిన కుమార్ (శ్రీకాంత్ రాథోడ్) అనే నిరుద్యోగ యువకుడు ఆ ఊరి నుండి వంద మంది సభ్యులను తీసుకొచ్చి ప్రభుత్వానికి వారిని నక్సలైట్లుగా చూపించి మధ్యవర్తి నుండి కమీషన్ తీసుకుంటాడు. ఊహించని క్రమంలో కేంద్ర ప్రభుత్వం చివరి నిమిషంలో ఆ పథకాన్ని రద్దు చేసింది. తరువాత ఆ వంద మంది సభ్యుల జీవితాలు ఎలాంటి సమస్యలు ఎదుర్కున్నాయనేది మిగతా కథ.

పెర్‌ఫార్మెన్స్‌లు:

కొత్త నటుడు శ్రీకాంత్ రాథోడ్ మంచి స్క్రీన్ ప్రెజెన్స్ కలిగి ఉన్నాడు. అతని నటన మరియు డైలాగ్ డెలివరీ ఆకట్టుకుంటుంది. జైత్రి మకనా తెరపై క్యూట్‌గా ఉంది అలాగే నటనాపరంగా మంచి మార్కులు వేయించుకుంది. శ్రీకాంత్‌తో ఆమె ఆన్-స్క్రీన్ కెమిస్ట్రీ ఈ చిత్రానికున్న హైలెట్స్ లో ఒకటి. కీలక పాత్రలో కనిపించిన ప్రవీణ్ కండెల నటన చిత్రానికి వాస్తవిక జోడించింది. శివరామ్, క్రాంతి, శరత్, వంశీ, వినీత్ తమపరిధిమేర ఆకట్టుకున్నారు.

టెక్నీకల్ డిపార్ట్మెంట్:

సంతోష్ మురారికర్ రాసిన డైలాగ్స్ బాగున్నాయి. ముఖ్యంగా ఆయన విప్లవ డైలాగులు సినిమాకు ప్లస్ అని చెప్పాలి. పల్లెటూరి వాతావరణాన్ని చక్కగా ప్రెజెంట్ చేసిన శ్రీకాంత్ ఏర్పుల ఫోటోగ్రఫీ వర్క్ బాగుంది. అతను అడవిని అద్భుతంగా చూపించాడు. జైదీప్ విష్ణు ఎడిటింగ్ ఓకే. మణిశర్మ అందించిన సంగీతం అన్ని కీలక సన్నివేశాల మూడ్‌ని ఎలివేట్ చేసింది. రెండు ఆహ్లాదకరమైన పాటలను అందించడమే కాకుండా, బ్యాక్ గ్రౌండ్ స్కోర్ బావుంది. పరిమిత-బడ్జెట్ మూవీకి నిర్మాణ విలువలు బాగానే ఉన్నాయి. సినిమాకి హైలైట్ మణిశర్మ సంగీతం. 

విశ్లేషణ:

రెబల్స్ ఆఫ్ తుపాకులగూడెం సినిమా ఆద్యంతం అడవుల నేపథ్యంలో సాగుతుంది. ఒక 100 మంది అమాయక గిరిజనులను ఒక బ్రోకర్ ఎలా మోసం చేశాడు అనే పాయింట్ చుట్టూ కథ మొత్తం తిరుగుతుంది. ఊరిని బాగు చేయడం కోసం వెళ్లిన క్రాంతి అనూహ్యంగా మరణించడం, అతని తమ్ముడు రాజన్న తన అన్న చావుకి కారణం తెలుసుకుని ఎలా అయినా ఊరి ప్రజల ముందు తన అన్నను నిర్దోషిగా నిలబెట్టాలని ప్రయత్నించడంలాంటి సన్నివేశాలు ఆసక్తికరంగా సాగుతాయి. నక్సలిజం నేపథ్యంలో నిరుద్యోగ యువత పడుతున్న కష్టాలను ప్రదర్శించాలనే ఆలోచన మంచిదే అయినప్పటికీ, నక్సలైట్ల సమస్యలను మరింత వాస్తవికంగా అమలు చేయడంలో టీమ్ మరింత కృషి చేసి ఉండాల్సింది. క్లుప్తంగా చెప్పాలంటే, తుపాకుల గూడెంలోని రెబెల్స్ అనేది నక్సలిజం చుట్టూ తిరిగే ఒక గ్రామ నాటకం. కథనంలో సమస్యలు ఉన్నప్పటికీ, అలాగే సినిమా పరంగా అద్భుతం అని అనలేం గానీ ఆద్యంతం ఆకట్టుకునే సినిమా. ప్రతి ఒక్కరూ కొత్త వారే అయినా సినిమా చూస్తున్నంత సేపు ఎలాంటి బోర్ ఫీలింగ్ కలిగించకుండా తమదైన శైలిలో ఆకట్టుకునే ప్రయత్నం చేశారు. 

రేటింగ్: 2.25/5