నాగ చైతన్య-సాయి పల్లవి కాంబోలో చందు మొండేటి తెరకెక్కించిన తండేల్ చిత్రం వచ్చే 7 న రిలీజ్ కి సిద్ధమైంది. తండేల్ నుంచి వస్తోన్న ఒక్కో పాట మ్యూజికల్ గాను, లిరికల్ గాను, రొమాంటిక్ గాను హిట్ అవడంతో.. తండేల్ పై అంచనాలు పెరిగిపోయాయి. ఇటీవల కాలంలో ఇంతగా ప్రేక్షకుల దృష్టిని ఆకర్షించిన చిత్రం మరేదీ లేదని చెప్పొచ్చు. భాష నేర్చుకుని, వేషం మార్చుకుని గత రెండేళ్లుగా ఈ సినిమా కోసమే ప్రాణం పెట్టిన నాగ చైతన్యకి కార్తీకేయ 2 తో అనూహ్యమైన సక్సెస్ అందుకున్న చందు మొండేటి అండగా నిలుచున్నాడు. ఏరికోరి పాత్రలు ఎంచుకునే సాయి పల్లవి ఇటీవలే అమరన్ తో తన స్ట్రెంత్ ప్రూవ్ చేసుకుని మరోమారు నాగ చైతన్యతో జత కట్టింది. వీరందరిని మించి బడ్జెట్ లెక్కలు వేసుకోకుండా, మార్కెట్ వాల్యూ చూసుకోకుండా తండేల్ కోసం తపన పడుతున్న బన్నీ వాస్ కృషి టాక్ ఆఫ్ ద ఇండస్ట్రీ అయ్యింది. మరిన్ని ప్రత్యేకతలు కలిగిన తండేల్ ట్రైలర్ నేడు విడుదలైన నేపథ్యంలో దానిపై ఓ లుక్కేద్దాం, ఎలా ఉందో చెక్ చేద్దాం..
నాగ చైతన్య - సాయి పల్లవిల రొమాన్స్, కెమిస్ట్రీ తండేల్ ట్రైలర్ ప్రతి ఫ్రెమ్ లో హైలెట్ గా నిలిచింది. మనిద్దరి గురించి అందరూ ఏవేవో అనుకుంటున్నారంటూ సాయి పల్లవి నత్తిగా మాట్లాడ్డం, అది నిజం చేస్తే పోలా అంటూ నాగ చైతన్య చెప్పిన డైలాగ్ ఇలా వారి ప్రేమను తెలియజేస్తే.. వృత్తిలో భాగంగా సాయి పల్లవికి దూరమైనపుడు సాయి పల్లవి విరహ వేదన, పాకిస్తాన్ జైల్లో చైతు బందీ అవడం, చైతు యాక్షన్ సీక్వెన్స్ అన్ని ట్రైలర్ లో హైలెట్ గా నిలిచాయి. అంతేకాదు టెక్నీకల్ గాను దేవిశ్రీ మ్యూజిక్, BGM, సినిమాటోగ్రఫీ అన్ని అద్భుతమే. అలాగే ప్రతి ఫ్రెమ్ లోని రిచ్ నెస్ బడ్జెట్ ని స్పష్టంగా తెలియజేస్తున్నాయి.
ఓవరాల్ గా తండేల్ గురించి ఒక్క మాటలో చెప్పాలంటే గదర్ ఆఫ్ టాలీవుడ్ తండేల్ అని చెప్పొచ్చు. అప్పట్లో పాకిస్తాన్ వెళ్లి లాహోర్ లో సన్నీ డియోల్ సృష్టించిన సంచలనం రెండు దశాబ్దాలైనా ప్రేక్షకులు మరిచిపోలేదు, అందుకే గదర్ 2 అనగానే అమితమైన ఆసక్తి కనబరిచారు, అభిమానం చూపించారు. ఫస్ట్ పార్ట్ స్థాయిలో లేకపోయినా షారుఖ్ ఖాన్ పఠాన్, జవాన్ లతో పోటీపడే స్థాయి సక్సెస్ ని అందించారు. భారతీయ సినిమా పరిశ్రమ గురించి క్షుణ్ణంగా తెలిసిన ఏ ప్రేక్షకుడికైనా తండేల్ ట్రైలర్ గదర్ ను గుర్తు చేస్తుంది. ఆ స్థాయి ఫలితాన్ని అందుకోగలదనే అంచనాలను సృష్టిస్తుంది.