దర్శకుడు రాజమౌళి, సూపర్ స్టార్ మహేష్ బాబు కలయికలో రాబోతున్న ప్యాన్ వరల్డ్ సినిమా ప్రారంభం నుంచే భారీ అంచనాలు సృష్టిస్తోంది. పూజా కార్యక్రమాలతో లాంఛనంగా మొదలైన ఈ ప్రాజెక్ట్ ఇప్పుడు రెగ్యులర్ షూటింగ్ దశకు చేరుకుంది. సోషల్ మీడియా వేదికగా ఈ సినిమాకు సంబంధించిన ఏ చిన్న అప్డేట్ అయినా ఇంటర్నేషనల్ లెవల్ లో వైరల్ అవుతోంది.
ఇప్పటికే మహేష్ బాబు, ప్రియాంకా చోప్రాలపై టెస్ట్ షూట్ పూర్తయ్యిందని సమాచారం. త్వరలోనే ఈ ప్రాజెక్టుకు సంబంధించిన కీలక ప్రకటన వెలువడనుంది. అయితే ఆ ప్రకటన ముందు నిన్న రాత్రి అనూహ్యంగా రాజమౌళి ఇన్‌స్టాగ్రామ్‌లో ఓ క్రేజీ ప్రమోషన్ షేర్ చేయడంతో అభిమానుల దృష్టిని మరింత ఆకర్షించారు.
రాజమౌళి ఓ ఫోటోలో సింహంని జైలులో బంధించి దాని పాస్‌పోర్ట్ తీసుకున్నట్టు చూపించారు. దీనికి మహేష్ బాబు స్పందిస్తూ, ఒకసారి కమిట్ అయితే, నా మాట నేనే వినను, అని వ్యాఖ్యానించడం అభిమానులకు మాంచి కిక్ ఇచ్చింది. ఈ పోస్టుతో సినిమా హైప్ మరింత పెరిగింది. రాజమౌళి సినిమాల ప్రత్యేకతే ఏదైనా అద్భుతంగా ప్లాన్ చేయడం. అదే ఈ ప్రమోషన్‌లోనూ కనిపిస్తోంది.
మహేష్ బాబు తరచుగా కుటుంబంతో కలిసి విదేశాలకు వెళ్తుంటారు. కానీ రాజమౌళి ప్రాజెక్ట్‌లో, షూటింగ్ సమయంలో అలాంటి విరామాలు సాధ్యపడవని చమత్కారంగా పాస్‌పోర్ట్ తీసుకున్నానని అర్థం వచ్చేలా ఈ ఫోటో షేర్ చేశారు. ఈ పోస్ట్‌ను ప్రియాంకా చోప్రా కూడా లైక్ చేయడంతో ప్రేక్షకుల ఆసక్తి మరింతగా పెరిగింది.
ఇది వరకు అటవీ ప్రదేశం బ్యాక్‌డ్రాప్‌లో జంతువులు, నిధులు, సాహసాలతో ఇండియానా జోన్స్ స్థాయిలో ఈ సినిమాను తెరకెక్కించనున్నట్లు సమాచారం. భారీ బడ్జెట్‌తో తయారవుతున్న ఈ విజువల్ గ్రాండియర్, ప్రపంచవ్యాప్తంగా ఇంగ్లీష్ సహా పలు భాషల్లో ఒకేసారి విడుదలయ్యేలా ప్లాన్ చేస్తున్నారు.
ఈ సినిమా బడ్జెట్ రూ. 1000 కోట్లకు పైగా ఉండనుందని టాక్. ఇప్పుడే హైప్ అంతగా ఉండగా, షూటింగ్ ప్రారంభం తరువాత మరిన్ని లీక్స్, అంచనాలు ఉంటాయన్నది ఖాయం. రాజమౌళి చిత్రీకరణ శైలిని దృష్టిలో పెట్టుకుని ఈ సినిమా మరో ఆణిముత్యంగా నిలుస్తుందని అభిమానులు నమ్మకంగా ఎదురుచూస్తున్నారు.