ప్రస్తుతం నేషనల్ క్రష్ గా పేరు తెచ్చుకున్న రష్మిక మందన్న, బాలీవుడ్ స్టార్ హీరో విక్కీ కౌశల్ ప్రధాన పాత్రలో నటిస్తున్న చావా చిత్రంలో కథానాయికగా మెరవనుంది. ఈ సినిమాకు లక్ష్మణ్ ఉటేకర్ దర్శకత్వం వహిస్తున్నారు. దీన్ని దినేష్ విజయన్ దివ్యంజలి ఎంటర్‌టైన్‌మెంట్స్ బ్యానర్‌పై నిర్మిస్తున్నారు. ఛత్రపతి శివాజీ మహారాజ్ కుమారుడు శంభాజీ మహారాజ్ జీవిత కథ ఆధారంగా ఈ చిత్రం రూపొందుతోంది. ఇందులో అక్షయ్ ఖన్నా, అశుతోష్ రాణా, దివ్య దత్తా వంటి ప్రముఖులు కీలక పాత్రలు పోషిస్తున్నారు. ఈ సినిమా ఫిబ్రవరి 14న థియేటర్లలో విడుదల కానుంది.
ఈ నేపథ్యంలో ముంబైలో జరిగిన చావా ట్రైలర్ లాంచ్ ఈవెంట్ లో రష్మిక తన అనుభవాలను పంచుకుంది. ఈ చిత్రంలో శంభాజీ మహారాజ్ భార్య ఏసుబాయి పాత్రను పోషించే అవకాశం రావడం తనకు పెద్ద గౌరవంగా భావిస్తున్నానని చెప్పింది. దర్శకుడు లక్ష్మణ్ ఉటేకర్ గారు ఈ పాత్రను ఎంతో ప్రాముఖ్యంతో డిజైన్ చేశారని, ఇలాంటి పాత్ర చేసిన తర్వాత ఒక నటిగా మరింత గర్వపడుతున్నానని తెలిపారు.
చావా షూటింగ్ సమయంలో తనకు చాలా సార్లు భావోద్వేగానికి లోనయ్యానని, ఈ సినిమా తనకు జీవితాంతం గుర్తుండిపోయే ఒక ప్రత్యేక అనుభవమని రష్మిక పేర్కొంది. తాను దర్శకుడితో ఒకసారి మాట్లాడుతూ.. ఇలాంటి పాత్ర చేసిన తర్వాత నేను రిటైర్ అయినా సరే ఎలాంటి అభ్యంతరం లేదు అని అనిపించిందని రష్మిక వ్యాఖ్యానించింది. ఈ సినిమాలో తన పాత్ర ద్వారా ప్రేక్షకులకు ఒక కొత్త కోణంలో కనిపించేందుకు అవకాశం దొరికిందని చెప్పిన ఆమె, సినిమా విడుదల కోసం ఆసక్తిగా ఎదురు చూస్తున్నట్లు వెల్లడించింది.