ఒకప్పుడు సినిమా రిలీజ్ ముందస్తు కార్యక్రమాలంటే స్పీచ్ లని జనం ఎంజాయ్ చేసేవారు. బాలకృష్ణ లాంటి స్థాయి వ్యక్తులు సదరు సినిమాలోని డైలాగులు ముందుగానే స్టేజ్ పై చెబుతుంటే.. విజిల్స్ కొట్టి వెర్రెత్తిపోయేవారు. అలా ఉండేది సినిమా ప్రమోషన్, ఆ విధంగా జరిగేది పబ్లిసిటీ. ఇప్పుడు మొదలైన వంకరు కింకరు పద్ధతుల్లో కొత్తపుంతలు కాదు కాదు చెత్తపుంతలు తొక్కుతున్నాయి పబ్లిసిటీ ఈవెంట్స్.
సినిమా ప్రమోషన్స్ కోసం హీరో-హీరోయిన్స్ ఈమధ్యన ఎంతకైనా దిగజారుతున్నారు. మహేష్ బాబు లాంటి స్టార్ హీరోనే స్టేజ్ పై డాన్స్ చేస్తే లేదు కానీ.. మేము వేస్తె వచ్చిందా అన్నట్టుగా కొంతమంది హీరో-హీరోయిన్స్ స్టేజ్ పై రెచ్చిపోతున్నారు. అలా చేస్తే సినిమాకి ఓపెనింగ్స్ వస్తాయి.. లేదంటే రావు అన్నట్టుగా ఫిక్స్ అవ్వబట్టే.. ఏ ప్రీ రిలీజ్ ఈవెంట్ లోనో.. లేదంటే ట్రైలర్ లాంచ్ ఈవెంట్ లోనో హీరో-హీరోయిన్స్ జతకట్టి స్టేజ్ పై డాన్స్ చేస్తున్నారు. కాలు కదిపితే తప్పు లేదు.. కానీ పైత్యం ముదితేనే కష్టం. టాలీవుడ్ లో బ్యాక్ టు బ్యాక్ రెండు ఈవెంట్స్ జరిగాయి.
అందులో మొదటిది విజయ్ దేవరకొండ-సమంత కాంబోలో తెరకెక్కిన ఖుషి మూవీ మ్యూజికల్ కాన్సెర్ట్. అందులో భాగంగా హైదరాబాద్ లో జరిగిన ఈ ఈవెంట్ లో విజయ్ దేవరకొండ షర్ట్ విప్పేసి సమంతని గాల్లోకి ఎగరేస్తూ చేసిన డాన్స్ అభిమానుల చేత విజిల్స్ వేయించినా.. అంత అసభ్యంగా డాన్స్ చెయ్యాల్సిన అవసరం మాత్రం కనిపించలేదు. అంటే ప్రమోషన్స్ కోసం ఏమైనా చేస్తారా.. స్టేజ్ పై విజయ్-సమంత కెమిస్ట్రీ కోసం ఏమేం చేసారో సోషల్ మీడియా నిండా అవే కనిపించాయి.
ఈరోజు బుధవారం విశ్వక్ సేన్-నేహా శెట్టిలు నటించిన గ్యాంగ్స్ అఫ్ గోదావరిలోని సుట్టంలా సూసి సాంగ్ లాంచ్ వేడుక మల్లారెడ్డి ఇంజినీరింగ్ కళాశాలలో జరిగింది. ఈ ఈవెంట్ లో స్టేజ్ పై రెచ్చిపోయి డాన్స్ చేసారు హీరో-హీరోయిన్స్. నేహా శెట్టి అయితే సారీ విప్పేసి లోపలికి విశ్వక్ ని లాగుతూ చేసిన డాన్సులు, వారి కౌగిలింతలు, ముద్దులు అక్కడైతే క్లాప్స్ కొట్టించింది కానీ ఆ చర్యలు పలు విమర్శలకి దారి తీసింది. విశ్వక్ సేన్-నేహా శెట్టిలు చేసిన అసభ్యకర డాన్స్ సోషల్ మీడియాలో వైరల్ అయ్యింది.
ఇది చూసిన నెటిజెన్స్ సినిమా ప్రమోషన్స్ కోసం ఇంతగా దిగజారిపోవాలా.. పద్దతిగా సినిమాని ప్రమోట్ చేస్తే సరిపోదా.. ఓపెనింగ్స్ కోసం ఇలాంటివేనా చేసేది అంటూ కామెంట్స్ చేస్తున్నారు.