ఈమధ్యన యశోద సినిమాలో ఆడియన్స్ నుండి మంచి మార్కులు వేయించుకుని.. ఆ సినిమాలో సమంత-వరలక్ష్మి శరత్ కుమార్ తో కలిసి నటించిన ఉన్ని ముకుందన్ ఇప్పుడు సమస్యల్లో ఇరుక్కున్నాడు. మలయాళ హీరో ఉన్ని ముకుందన్ పై 2018 లో ఓ మహిళ లైంగిక వేధింపుల కేసు పెట్టగా.. ఆకేసులో ఉన్ని ముకుందన్ కోర్టుకెళ్లి స్టే తెచ్చుకున్నాడు. అయితే ఇప్పుడు ఉన్ని ముకుందన్ కి కేరళ కోర్టు షాకిచ్చింది. ఆ కేసులో ఉన్ని ముకుందన్ స్టే రద్దు చేస్తూ కోర్టు ఉత్తర్వులు జారీ చెయ్యడంతో ఉన్ని ముకుందన్ చిక్కుల్లో పడ్డాడు.
2018 లో ఉన్ని ముకుందన్ పై యువతి కేసు పెట్టగా.. దానికి ఉన్నిముకుందన్ లాయర్ జిమ్మిక్కులు చేసి ఆ యువతి కోర్టు బయట సెటిల్మెంట్ చేసుకునేందుకు సంతకం చేసినట్టుగా పత్రాలు సృష్టించి కోర్టుకి సబ్మిట్ చెయ్యడంతో కోర్టు ఆ యువతి ఫిర్యాదు కొట్టిపారేసింది. అప్పుడే ఉన్ని ముకుందన్ కి కోర్టు స్టే ఇచ్చింది. కానీ బాధిత యువతి తాను ఏ పత్రాలపై సంతకం చెయ్యలేదని కోర్టుకి విన్నవించుకోవడంతో.. ఇమ్మిడియట్ గా ఉన్ని ముకుందన్ స్టే విత్ డ్రా చేసుకుంది కోర్టు. అంతేకాకుండా తప్పుడు పత్రాలు చూపించినందుకు ఉన్ని ముకుందన్ లాయర్ పై కోర్టు ఆగ్రహం వ్యక్తం చేసింది.
ఇంకా ఉన్నిముకుందన్ ఈ కేసులో అఫిడవిడ్ దాఖలు చెయ్యాలని కోర్టు ఆదేశించింది. ఈ కేసు విచారణని ఈ నెల 17 కి వాయిదా వేసింది కేరళ కోర్టు.