సూపర్ స్టార్ మహేష్ బాబు హీరోగా అనిల్ రావిపూడి దర్శకత్వంలో వచ్చిన సరిలేరు నీకెవ్వరు చిత్రం బాక్సాఫీసుని షేక్ చేసింది. రష్మిక మందన్న హీరోయిన్ గా నటించిన ఈ చిత్రం మహేష్ కెరీర్లోనే హయ్యెస్ట్ గ్రాసర్ గా నిలిచింది. ఇప్పటి వరకూ అపజయమే ఎరుగని అనిల్ రావిపూడి సరిలేరు నీకెవ్వరు సినిమాతో కెరీర్ బెస్ట్ హిట్ అందుకున్నాడు. చాలా రోజుల తర్వాత విజయశాంతి తెర మీద కనిపించిన ఈ చిత్రం ప్రేక్షకులని విపరీతంగా ఆకట్టుకుంది.
సంక్రాంతి కానుకగా వచ్చిన ఈ బొమ్మ బ్లాక్ బస్టర్ అనిపించుకుంది. అయితే వెండితెర మీద సంచలనం సృష్టించిన సరిలేరు నీకెవ్వరు బుల్లితెర మీద సైతం రికార్డులని క్రియేట్ చేస్తుంది. ఇప్పటి వరకు టెలివిజన్ పై రెండు సార్లు టెలిక్యాస్ట్ అయిన ఈ చిత్రం రికార్డు స్థాయిలో రేటింగ్స్ దక్కించుకుంది. అయితే తెలుగులోనే కాకుండా కన్నడలో సైతం సరికొత్త రికార్డు సృష్టించింది.
మేజర్ అజయ్ క్రిష్ణ గా కన్నడలో అనువాదం అయిన ఈ చిత్రం ఇటీవల కన్నడ టెలివిజన్లో టెలిక్యాస్ట్ అయ్యి 6.5 రేటింగ్స్ ని దక్కించుకుంది. ఒక తెలుగు సినిమా ఈ రేంజిలో రేటింగ్స్ తెచ్చుకోవడం ఇదే ప్రథమం. అంతకుముందు ఆ రికార్డు చిరంజీవి సైరా నరసింహారెడ్డి పేరు మీదుండేది. 6.3 రేటింగ్స్ తో కన్నడలో టాప్ రేటింగ్స్ అందుకున్న చిరంజీవిని సరిలేరు నీకెవ్వరు సినిమాతో దాటిపోయాడు. మొత్తానికి సినిమా వచ్చి ఎనిమిది నెలలు అవుతున్నా రికార్డులు మాత్రం ఆగడం లేదు.