నేచురల్ స్టార్ నాని- డైరెక్టర్ మారుతి కాంబినేషన్లో వచ్చిన భలే భలే మగాడివోయ్ సినిమా బ్లాక్ బస్టర్ గా నిలిచిన సంగతి తెలిసిందే. అప్పటి వరకూ నాని కెరీర్లో బిగ్గెస్ట్ హిట్ గా నిలిచింది. ఈ సినిమా ద్వారానే నాని మార్కెట్ బాగా పెరిగింది. అయితే ప్రస్తుతం వీరిద్దరి కాంబినేషన్ మళ్లీ రిపీట్ కాబోతుందని అంటున్నారు. గత కొన్ని రోజులుగా ఈ కాంబినేషన్ పై వార్తలు వస్తున్న మాట నిజమే. నాని అభిమానులు కూడా ఈ కాంబినేషన్ మళ్లీ కుదరాలని ఆసక్తిగా ఎదురుచూస్తున్నారు.
అయితే వీరిద్దరి కాంబినేషన్ కుదిరినా కూడా ప్రస్తుతం నాని చేతుల్లో ఉన్న సినిమాలని చూస్తుంటే ఇప్పట్లో ఖాళీ అయ్యేలా లేడు. శివ నిర్వాణ దర్శకత్వంలో టక్ జగదీష్ సినిమా చేస్తున్న నాని, ఆ తర్వాత టాక్సీవాలా ఫేమ్ రాహుల్ సాంక్రిత్యాయన్ రూపొందిస్తున్న శ్యామ్ సింగరాయ్ లో నటిస్తున్నాడు. శ్యామ్ సింగరాయ్ నాని కెరీర్లోనే భారీ బడ్జెట్ చిత్రంగా తెరకెక్కుతోంది. ఈ రెండు చిత్రాల అనంతరం రామ్ చరణ్ రంగస్థలం చిత్రానికి అసిస్టెంట్ గా పనిచేసిన కొత్త దర్శకుడితో చేయనున్నాడని వార్తలు వచ్చాయి.
ఈ సినిమాలన్నీ పూర్తవ్వాలంటే కనీసం రెండేళ్లయినా పడుతుంది. మరి మారుతితో సినిమా అంటే రెండేళ్ల వరకు వెయిట్ చేయాల్సిందే. లేదంటే ఈ సినిమాల్లో ఏదో ఒక సినిమాని పక్కన పెట్టి మారుతితో పనిచేయాలి. మరి నాని ఏం చేస్తాడో చూడాలి.