బాహుబలి సినిమాతో ప్రభాస్ రేంజ్ ఎంతలా మారిందో అందరికీ తెలిసిందే. అయితే అది ప్రాక్టికల్ గా నిరూపితమైంది మాత్రం సాహో సినిమాతోనే. బాహుబలి సినిమా పాన్ ఇండియా రేంజ్ లో విజయవంతం కావడానికి చాలా ఫ్యాక్టర్స్ తోడ్పడ్డాయి. ఆ ఫ్యాక్టర్స్ అన్నింటిలో ఒక అతిపెద్ద ఫ్యాక్టర్ గా ప్రభాస్ నిలిచాడు. కానీ సాహో సినిమాకి అలా జరగలేదు. ఆ సినిమా ప్రభాస్ పేరు మీదనే ఆడింది.
దక్షిణాదిన మిశ్రమ స్పందన తెచ్చుకున్న సాహో సినిమాకి బాలీవుడ్ జనాలు నీరాజనాలు పట్టారు. దాంతో బాలీవుడ్ లో ప్రభాస్ రేంజ్ ఏ స్థాయిలో ఉందో అర్థమై పోయింది. ప్రస్తుతం ప్రభాస్ రాధాక్రిష్ణ దర్శకత్వంలో సినిమా చేస్తున్న సంగతి తెలిసిందే. ఈ సినిమా అనంతరం ప్రభాస్ మహానటి దర్శకుడు నాగ్ అశ్విన్ తో సినిమా చేయడానికి ఒప్పుకున్నాడు. సైన్స్ ఫిక్షన్ జోనర్ లో టైమ్ ట్రావెలింగ్ నేపథ్యంలో తెరకెక్కనున్న ఈ సినిమాలో ప్రభాస్ పక్కన నటించేందుకు హీరోయిన్ ని వెతుకుతున్నారు.
పాన్ ఇండియా రేంజ్ లో తెరకెక్కనున్న ఈ సినిమాలో బాలీవుడ్ భామ అయితే బాగుంటుందని చిత్రబృందం భావిస్తోంది. కబీర్ సింగ్ సినిమాతో బాలీవుడ్ లో విజయం అందుకున్న కియారా అద్వానీ ఈ ఈ సినిమాలో హీరోయిన్ గా తీసుకోవాలని చూస్తున్నారట. ఇప్పటికే ఫోన్ ద్వారా చర్చలు జరిగాయని సమాచారం. కియారా అద్వానీ తెలుగులో భరత్ అనే నేను, వినయ విధేయ రామ సినిమాలో నటించింది. మరి ఈ సినిమాలోనూ అవకాశం దక్కించుకుని స్టార్ హీరోయిన్ గా ఎదుగుతుందేమో చూడాలి.