అక్కినేని నాగార్జున, రకుల్ ప్రీత్‌సింగ్ నటీనటులుగా రాహుల్ రవీంద్రన్ తెరకెక్కిన చిత్రం ‘మన్మథుడు 2’. ఆగస్ట్-09న మన్మథుడుగా అభిమానుల ముందుకు వచ్చిన నాగ్ మంచి హిట్ టాక్ సంపాదించుకున్నారు. ముఖ్యంగా ఈ సినిమాలో నాగార్జున వయసు మళ్లినా పెళ్లి కాని బ్రహ్మచారి పాత్రలో డిఫరెంట్‌గా కనిపించి అందర్నీ మెప్పించారు. ఇవన్నీ ఒక ఎత్తయితే కామెడీ మాత్రం కిరాక్ అనిపించింది. ఈ సినిమాను చూసిన పలువురు ప్రముఖులు, వీరాభిమానులు సోషల్ మీడియా వేదికగా అక్కినేనికి కంగ్రాట్స్ చెబుతూ.. చిత్రబృందాన్ని మెచ్చుకుంటున్నారు. అయితే తాజాగా నాగ్ సతీమణి అమల ట్విట్టర్ ద్వారా రియాక్ట్ అయ్యారు.
మన్మథుడు-2 సినిమా చూస్తున్నంతసేపు నవ్వాపుకోలేకపోయానని చెప్పుకొచ్చారు. సినిమాలోని కొన్ని సీన్లు చూసి నవ్వి.. నవ్వి సీట్లోంచి కిందపడిపోయానని తెలిపారు. ‘మన్మథుడు-2’ ఎంతో నచ్చిందని, ఇది పూర్తిగా నవతరం చిత్రం అని అమల అభిప్రాయపడ్డారు. ఇందుకు అక్కినేని అభిమానులు, సినీ ప్రియులు పెద్ద ఎత్తున కామెంట్ల వర్షం కురిపిస్తున్నారు. మరికొందరు అభిమానులు మాత్రం మేడమ్.. ఇదేం సినిమా.. అంటూ కామెంట్స్ చేస్తున్నారు.