మెగా ఫ్యామిలీ నుంచి మరో హీరో దిగుతున్నాడు. ఇప్పటికే క్రికెట్ టీమ్‌ నెంబర్‌కు దగ్గరవుతున్న మెగా టీమ్‌లో ఇప్పుడు రాబోతోంది మరెవరో కాదు.. సాయిధరమ్ తేజ్ తమ్ముడు వైష్ణవ్ తేజ్. కొద్ది రోజుల క్రితమే షూటింగ్ ప్రారంభించుకున్న ఈ చిత్రానికి సుకుమార్ దగ్గర అసిస్టెంట్‌గా పనిచేసిన బుచ్చిబాబు దర్శకుడు. ఈ చిత్రాన్ని సుకుమార్ రైటింగ్స్, మైత్రీ మూవీ మేకర్స్ నిర్మిస్తున్నారు. ఇప్పటికే ఫస్ట్‌లుక్ పోస్టర్‌ను విడుదల చేసుకున్న ఈ చిత్ర టైటిల్ గురించి రెండు మూడు రోజులుగా నెట్ ప్రపంచంలో గట్టిగా వినిపిస్తోంది.
ఎవరో నెట్‌లో ఈ సినిమాకు ‘జాలరి’ అనే టైటిల్ ఫిక్స్ చేసి ఫ్యాన్ మేడ్ పోస్టర్‌ను విడుదల చేయగా.. దానినే ఈ చిత్ర టైటిల్ అంటూ కొందరు వార్తలు సృష్టించేశారు. అయితే ఈ చిత్రానికి టైటిల్‌ను చిత్రయూనిట్ ఎప్పుడో రిజిష్టర్ చేయించిందట. సడెన్‌గా ఈ చిత్రానికి ‘జాలరి’ అనే టైటిల్ వినిపించడంతో చిత్రయూనిట్ కూడా ఇప్పుడు ఆలోచనలో పడినట్లుగా తెలుస్తుంది. వాస్తవానికి ఈ చిత్రానికి ‘ఉప్పెన’ అనే టైటిల్‌ను మేకర్స్ రిజిస్టర్ చేయించారట. కానీ సోషల్ మీడియాలో ‘జాలరి’ అనే టైటిల్‌కు మంచి రెస్సాన్స్ వస్తుండటంతో మేకర్స్ కూడా ఈ టైటిల్ పెడితే ఎలా ఉంటుందా? అనే ఆలోచనలో ఉన్నారట.
పరువు హత్యల నేపథ్యంలో రూపుదిద్దుకున్న ఈ చిత్ర కథ చాలా అద్భుతంగా వచ్చిందని, గ్యారంటీగా వైష్ణవ్ ఎంట్రీతోనే చాలా గొప్ప నటుడిగా నిరూపించుకునే అవకాశం ఉన్న స్టోరీ అని అంటున్నారు. ఇక హీరోయిన్‌గా మనీషా నటిస్తున్న ఈ చిత్రానికి దేవిశ్రీ ప్రసాద్ సంగీతం అందిస్తున్నారు. టాప్ టెక్నిషీయన్స్ పనిచేస్తున్న ఈ చిత్రంతో వైష్ణవ్ తేజ్ ఎంట్రీ గ్రాండ్‌గా ఉండబోతోందని అప్పుడే మెగా సర్కిల్స్‌లో వినిపిస్తోంది.