'పెళ్లి చూపులు' హీరో విజయ్ దేవరకొండ తెలుగులో స్టార్ హీరో గా అతి తక్కువ సమయంలో మారడమే కాదు.. లేటెస్ట్ గా తమిళ భాషలో ఎంట్రీ ఇచ్చి 'నోటా' అనే సినిమా చేసి పరాజయం పొందిన సంగతి తెలిసిందే. ఈ సినిమా తమిళంలోనే కాదు... తెలుగులో కూడా డిజాస్టర్ అయింది. దాంతో విజయ్ దేవరకొండ ఇప్పట్లో తమిళ ఇండస్ట్రీ వైపు కన్ను వేయడు అనుకున్న టైములో మరోసారి తమిళ చిత్రానికి ఓకే చేసాడనే టాక్ ఫిలింసర్కిల్స్ లో నడుస్తుంది. విజయ్ దేవరకొండ ఈ చిత్రాన్ని కూడా ద్వి భాషా చిత్రంగానే చేస్తున్నాడు. విజయ్ నటించనున్న బైలింగ్యువల్ మూవీని డ్రీం వారియర్ పిక్చర్స్ అధినేత ఎస్ ఆర్ ప్రభు నిర్మించనున్నారని సమాచారం .
ఇక అన్ని ఒకే అనుకుంటే కొత్త దర్శకుడు శ్రీ కార్తీక్ డైరెక్ట్ చేయనున్న ఈ చిత్రంలో తమిళ రైజింగ్ కమెడియన్ యోగిబాబు నటించనున్నాడని చెబుతున్నారు. ప్రస్తుతం ప్రీ ప్రొడక్షన్ లో ఉన్న ఈ చిత్రంపై త్వరలోనే అధికారిక ప్రకటన రావాల్సి ఉంది. విజయ్ ప్రస్తుతం తెలుగులో రెండు సినిమాలతో బిజీగా ఉన్నాడు. ‘డియర్ కామ్రేడ్’ అనే సినిమాతో పాటు ‘మళ్ళీ మళ్ళీ ఇది రాని రోజు’ ఫేమ్ క్రాంతి మాధవ్ డైరెక్షన్ లో ఓ సినిమా చేయనున్నాడు. ఈ రెండు చిత్రాలు పూర్తయిన తరువాత ఈ చిత్రాన్ని తమిళ డైరెక్టర్ తో సెట్స్ మీదకు తీసుకుని వెళ్తాడు విజయ్. ఇక ఈ బైలింగ్యువల్ మూవీలో విజయ్ కి జోడిగా ఎవరు నటిస్తారో తెలియాల్సిఉంది. మరి 'నోటా' తో డిజాస్టర్ అందుకున్న విజయ్ వెంటనే మళ్లీ తమిళ సినిమాలపై ఎందుకు పడ్డాడో అర్ధం కావట్లేదు.