ఇప్పటికే కలెక్షన్‌ కింగ్‌గా పేరున్న మోహన్‌బాబుకి మరో బిరుదు వరించింది. టి.సుబ్బరామిరెడ్డి కళాపరిషత్‌ ఆయనను 'విశ్వనట సార్వభౌమ' బిరుదుతో సత్కరించింది. హైదరాబాద్‌లోని టీఎస్‌ఆర్‌-కాకతీయ మహోత్సవం సందర్భంగా హాజరైన సినీ, రాజకీయ ప్రముఖుల సమక్షంలో మోహన్‌బాబుని శాలువాతో సత్కరించి ఈ బిరుదు ప్రధానం చేశారు. ఇక కళా సేవలో తరిస్తున్న టి.సుబ్బరామిరెడ్డి ధన్యజీవి అని బాలయ్య పొగడగా, అజాత శత్రువు, గొప్ప వ్యక్తి టి.సుబ్బరామిరెడ్డి అని మోహన్‌బాబు ప్రశంసించారు.
కళాకారులను సత్కరించే సంస్కారం ఉన్న టి.సుబ్బరామిరెడ్డికి శివకటాక్షం మరింతగా కలగాలని దేవుడిని ప్రార్ధిస్తున్నానని, ఈ అవార్డుతో సత్కరించిన టీఎస్‌ఆర్‌కి ధన్యవాదాలు తెలుపుతున్నానని అన్నారు. ఈ సందర్భంగా మోహన్‌బాబు తన కెరీర్‌లో పడిన కష్టనష్టాలు, ఇబ్బందులు, సంతోషాలను నెమరువేసుకున్నారు. తనకి ఎంతో ఆప్తుడు, మంచి మనసున్న మహారాష్ట్ర గవర్నర్‌ విద్యాసాగర్‌ రావు సమక్షంలో ఈ అవార్డు తీసుకోవడం సంతోషంగా ఉందని, ఆయనతో తనకు ఉన్న అనుభవాలను మోహన్‌బాబు సభాముఖంగా గుర్తు చేసుకున్నారు. సో.. కలెక్షన్‌ కింగ్‌ ఇక నుంచి 'విశ్వనట సార్వభౌమ'గా పిలుచుకోవచ్చన్నమాట. ఎంతో టాలెంట్‌ ఉన్న మోహన్‌బాబు నిజంగానే ఈ అవార్డుకి అర్హుడని చెప్పాలి.