పవన్ కళ్యాణ్ - త్రివిక్రమ్ కలయికలో వస్తున్న పవన్ 25 వ సినిమాపై భారీ అంచనాలున్నాయి. ఈ సినిమాలో పవన్ కళ్యాణ్... కీర్తి సురేష్, అను ఇమ్మాన్యువల్ తో జోడి కడుతున్నాడు. హారిక అండ్ హాసిని క్రియేషన్స్ వారు నిర్మిస్తున్న ఈ సినిమా 2018 జనవరి 10 న సంక్రాంతికి విడుదల కాబోతుంది. ఇక ఈ చిత్రంపై భారీ అంచనాలున్నాయి. 'జల్సా, అత్తారింటికి దారేది' వంటి సూపర్ హిట్స్ ఇచ్చిన ఈ కాంబినేషన్ మరలా రిపీట్ కావడంతోనే ఈ సినిమాపై ఇన్ని అంచనాలు నెలకొన్నాయి. అసలు మామూలుగానే పవన్ సినిమాలకు భారీ క్రేజ్ ఉంటుంది.
ఇక ప్రస్తుతం విదేశాల్లో షూటింగ్ జరుపుకుంటున్న ఈ చిత్రం టైటిల్ 'అజ్ఞాతవాసి' అంటూ ప్రచారంలో ఉంది. ఇకపోతే పవన్ 25 వ చిత్ర ప్రీ రిలీజ్ బిజినెస్ అదరగొడుతున్నట్లు ఎప్పటినుండో ప్రచారం జరుగుతుంది. తాజాగా ఈ చిత్రం నైజాంలో రికార్డు స్థాయి బిజినెస్ చేసిందని చెబుతున్నారు. నైజాం హక్కుల్ని ప్రముఖ నిర్మాత, డిస్ట్రిబ్యూటర్ దిల్ రాజు 29 కోట్ల భారీ మొత్తానికి చేజిక్కించుకున్నట్లుగా తెలుస్తుంది. మరి ఈ రేటు చూస్తుంటే కళ్ళు తిరగడం ఖాయం అంటున్నారు. ఎందుకంటే బాహుబలి చిత్రం తర్వాత ఆ రేంజ్ లో నైజామ్ లో ఆ ధర పలకడం కేవలం పవన్ చిత్రానికే సాధ్యమైందంటున్నారు. మహేష్ 'స్పైడర్' 22 కోట్లు, ఎన్టీఆర్ 'జై లవ కుశ' 20.50 కోట్లకి నైజాం రైట్స్ అమ్ముడుపోయాయి.
మరి ఈ లెక్కన పవన్ - త్రివిక్రమ్ చిత్రం 2018 సంవత్సరం మొదట్లోనే రికార్డులు సృష్టించడం ఖాయంలాగే కనబడుతుంది. నైజాం వరకు పవన్ ని మహేష్ కానీ, ఎన్టీఆర్ కానీ మించలేరు అనేది మరొక్కసారి నిరూపితమైంది. ఇక ఈ చిత్రానికి అనిరుధ్ సంగీత అందిస్తుండగా.... ఖుష్బూ, ఇంద్రజ, ఆదిపినిశెట్టి వంటి నటులు నటిస్తున్నారు. ఇక ఈ చిత్రం మొత్తం తండ్రి కొడుకుల అనుబంధంతో పెనవేసుకుని ఉంటుందనే ప్రచారం జరుగుతుంది.