కింగ్‌ నాగార్జున తన కొడుకులైన నాగచైతన్య, అఖిల్‌ల కెరీర్‌ను, వారు చేసే చిత్రాలను, స్టోరీలను, దర్శకులను కన్‌ఫర్మ్‌ చేస్తూనే మరోపక్క వారిని వ్యక్తిగతంగా కూడా ఓ ఇంటివారిని చేస్తున్నాడు. ఇక గతంలో స్వర్గీయ ఇవివి దర్శకత్వంలో నాగార్జున నటించిన 'హలో బ్రదర్' చిత్రం అద్భుతమైన విజయం సాధించింది. ఈ చిత్రం నాగ్‌లోని కొన్ని కోణాలను హైలైట్‌ చేసి, ఆయన కెరీర్‌లో ఓ మరపురాని చిత్రంగా మిగిలిన సంగతి తెలిసిందే. ఈ చిత్రానికి సీక్వెల్ చేయాలని భావించిన నాగచైతన్య 'ఢమరుకం' దర్శకుడు శ్రీనివాసరెడ్ది డైరెక్షన్‌లో సి.కళ్యాణ్‌ నిర్మాతగా చిత్రం షూటింగ్‌ను కూడా ప్రారంభించి అనేక కారణాల వల్ల ఆ ప్రాజెక్ట్‌ను మధ్యలో వదిలేయడంతో అక్కినేని అభిమానులు ఎంతగానో నిరాశ చెందారు. ఇక నాగ్‌ నటించిన 'హలో బ్రదర్' విషయానికి వస్తే ఈ చిత్రం అనేక భాషల్లో రీమేక్‌ అయింది. దాదాపు అన్ని భాషల్లోనూ విజయం సాధించింది. ఈ చిత్రాన్ని సల్మాన్‌ఖాన్‌ హీరోగా దర్శకుడు డేవిడ్‌ ధావన్‌ 'జుడ్వా' పేరుతో బాలీవుడ్‌లో రీమేక్‌ చేశాడు. అక్కడ కూడా ఆ చిత్రం ఘనవిజయం సాధించింది. దీంతో ఇంతకాలానికి ఈ చిత్ర దర్శకుడు డేవిడ్‌ధావన్‌ ఈ చిత్రానికి సీక్వెల్‌ను అనౌన్స్‌ చేసి తాజాగా ఈచిత్రం ఫస్ట్‌లుక్‌ని విడుదల చేశాడు.
ఇందులో వరణ్‌ధావన్‌ హీరోగా నటిస్తుండగా, జాక్వలినా ఫెర్నాండేజ్‌, తాప్సిలు హీరోయిన్లుగా నటిస్తున్నారు. ఈ ఏడాది సెప్టెంబర్‌ 29న రిలీజ్‌ కానుంది. కానీ 'జుడ్వా'కు కొనసాగింపుగా ఈ టైటిల్‌ను పెట్టామే గానీ ఆ చిత్రానికి ఈ చిత్రానికి పేరులో తప్ప కథలో సంబంధం ఉండదని దర్శకుడు అంటున్నాడు. మరి ఈ చిత్రం విడుదలైన తర్వాత బాగా ఆడి నాగ్‌, చైతూలను ఇంప్రెస్‌ చేస్తే ఈ చిత్రాన్ని తెలుగులో చైతూ రీమేక్‌ చేసే అవకాశం ఉందంటున్నారు. కాగా ప్రస్తుతం చైతూ జోరు మీదున్నాడు. తన తండ్రికి 'సోగ్గాడే.. ' వంటి బ్లాక్‌బస్టర్‌ని అందించిన కళ్యాణ్‌కృష్ణ దర్శకత్వంలో రకుల్‌ప్రీత్‌సింగ్‌ హీరోయిన్‌గా నటిస్తున్న చిత్రం షూటింగ్‌ మరికొద్ది కాలంలో పూర్తి కానుంది. సాధారణంగా సినిమా విడుదలకు ముందే తమ చిత్రం అద్భుతంగా ఉంటుందని డప్పు వాయించే వ్యక్తి నాగ్‌ కాదు. కానీ ఆయన సైతం ఈ చిత్రం తాను నటించిన 'నిన్నేపెళ్లాడతా' తరహాలో ఉండి, ఓ కొత్త ట్రెండ్‌ను క్రియేట్‌ చేసే లవ్‌ అండ్‌ ఫ్యామిలీ రొమాంటిక్‌ ఎంటర్‌టైనర్‌గా ఉంటుందని తెలిపాడు. దర్శకుడు కళ్యాణ్‌కృష్ణపై నాగ్‌ ఎంతో నమ్మకంగా ఉన్నాడు. తాజాగా వారాహిచలన చిత్రం బేనర్‌లో చైతూ కొత్త దర్శకుడు కృష్ణ మురిముత్తు దర్శకత్వంలో ఓ కొత్త చిత్రం ప్రారంబించాడు. ఇందులో తన తండ్రికి కలిసొచ్చిన లావణ్యత్రిపాఠి హీరోయిన్‌గా నటిస్తుండటం విశేషం. 'ప్రేమమ్‌, సాహసం శ్వాసగా సాగిపో' చిత్రాలు కేవలం నెల వ్యవధిలోపే విడుదలయ్యాయి. కాస్త గ్యాప్‌ ఇచ్చినా కూడా చైతు జోరు మీదనే ఉన్నాడని చెప్పాలి...!