ఇండస్ట్రీలో ఎవ్వరి అండదండలు లేకుండా చిత్రాలు చేస్తూ, 'స్వామిరా..రా'తో కెరీర్‌ను మలుపు తిప్పుకొని, సినిమా సినిమాకి తన రేంజ్‌ను పెంచుకుంటూ, విభిన్న చిత్రాల హీరోగా పేరుతెచ్చుకుంటున్న యంగ్‌హీరో నిఖిల్‌. కాగా 'ఎక్కడికి పోతావు చిన్నవాడా'తో సంచలన విజయం అందుకున్న ఈ చిన్నోడు నటించే తదుపరి చిత్రంపై అందరికీ బోలెడు అంచనాలున్నాయి. తన కెరీర్‌ను 'స్వామిరా..రా'తో మలుపుతిప్పిన దర్శకుడు సుధీర్‌వర్మతో ప్రస్తుతం ఆయన ఓ చిత్రంలో నటిస్తున్న సంగతి తెలిసిందే. 'కేశవ' అనే టైటిల్‌తో తెరకెక్కుతోన్న ఈ చిత్రం ఫస్ట్‌లుక్‌ తాజాగా విడుదలై అందరిలో ఆసక్తిని పెంచుతోంది.
ఇన్నాళ్లు మన పక్కింటి అబ్బాయిలా కనిపించి, ఎలాంటి ఇమేజ్‌ ఛట్రంలో ఇరుక్కోకుండా దూసుకుపోతున్న ఈ యంగ్‌హీరో తాజాగా విడుదలైన 'కేశవ' స్టిల్‌ను చూస్తే మాత్రం ఆయన ఇప్పటివరకు టచ్‌ చేయని మాస్‌ చిత్రంతో వస్తున్నాడా?అనే అనుమానం కలుగుతోంది. అయినా నిఖిల్‌ ఒప్పుకున్నాడంటే ఈ చిత్రం రెగ్యులర్‌గా నడిచే యాక్షన్‌ చిత్రం కాదని, ఇది కూడా నిఖిల్‌ అభిరుచికి తగ్గ ఓ వైవిధ్య రివెంజ్‌ డ్రామాగా తెరకెక్కుతుందనే నమ్మకం కలుగుతోంది. ఈ చిత్రం షూటింగ్‌ కూడా దాదాపుగా పూర్తికావస్తోంది. మొత్తానికి 'స్వామిరా..రా'తో ఈ యంగ్‌హీరోకు బ్రేక్‌నిచ్చిన దర్శకుడు సుధీర్‌వర్మ 'కేశవ' చిత్రం ద్వారా నిఖిల్‌ను మరోమెట్టు పైకెక్కించడం ఖాయమని టాలీవుడ్‌ వర్గాలు నమ్మకం వ్యక్తం చేస్తున్నాయి.