గత కొన్నిరోజులుగా ప్రజలు కరెన్సీ కష్టాలు, ప్రకృతి వైపరీత్యాలతో తీవ్రంగా టెన్షన్‌లో ఉన్నారు. దీంతో ఈ ఏడాది చివరి నెల అయిన డిసెంబర్‌ను నవ్వుల నెలగా మార్చడానికి మన కమెడియన్లు, దర్శకనిర్మాతలు రెడీ అయిపోతున్నారు. రేపు అంటే 16వ తేదీన పృథ్వీ ముఖ్యపాత్రను పోషిస్తోన్న 'మీలో ఎవరు కోటీశ్వరుడు' చిత్రం విడుదల కానుంది. ఈ చిత్రానికి గతంలో అల్లరి నరేష్‌..శ్రీకాంత్‌లతో పలు కామెడీ హిట్స్‌ను అందించిన ఇ.వి.వి.సత్తిబాబు దర్శకత్వం వహిస్తున్నాడు. ఇందులో పృథ్వీ కామెడీ సినిమాకు హైలైట్‌గా నిలవనుంది. ఇక డిసెంబర్‌ 23న స్టార్‌ కమెడియన్‌గా ఎదుగుతున్న సప్తగిరి హీరోగా నటిస్తున్న'సప్తగిరి ఎక్స్‌ప్రెస్‌' విడుదల కానుంది.
కాగా ఈ చిత్రం ఆడియోను పవర్‌స్టార్‌ పవన్‌కళ్యాణ్‌ విడుదల చేయడం, ట్రైలర్స్‌లో తన డ్యాన్స్‌లు, నటనతో అదరగొడుతున్న సప్తగిరి కామెడీ ఈ చిత్రానికి మేజర్‌ ఎస్సెట్స్‌ అంటున్నారు. దీంతో ఈ చిత్రం కూడా మంచి అంచనాలను రేకెత్తిస్తోంది. ఇక నవంబర్‌లోనే విడుదల కావాల్సి వుండి, మోదీ ఎఫెక్ట్‌ వల్ల విడుదల ఆలస్యమైన అల్లరి నరేష్‌ చిత్రం 'ఇంట్లో దెయ్యం.. నాకేం భయం' డిసెంబర్‌ 30న విడుదలై ఈ ఏడాదికి ఘనంగా వీడ్కోలు చెప్పడానికి రెడీ అవుతోంది. కామెడీ చిత్రాలను తెరకెక్కించడంలో దిట్ట అయిన దర్శకుడు నాగేశ్వర్‌రెడ్డి ఈ చిత్రానికి డైరెక్షన్‌ చేస్తుండటం, భారీ నిర్మాత బి.వి.ఎస్‌.ఎన్‌.ప్రసాద్‌ నిర్మాణ విలువలు ఈ చిత్రానికి ప్లస్‌ పాయింట్‌ కానున్నాయి. కాగా గత కొంత కాలంగా హిట్‌కు మొహం వాచిపోయి కెరీర్‌లో డేంజర్‌ బెల్స్‌ మోగుతోన్న అల్లరోడికి ఈ చిత్ర విజయం చాలా కీలకంగా మారనుంది. ఈ చిత్రం రిజల్ట్‌పైనే అల్లరోడి భవిష్యత్తు ఆఢారపడి ఉందని చెప్పవచ్చు. నేడు హర్రర్‌ కామెడీ చిత్రాలు మంచి ఆదరణను సాధిస్తున్న ట్రెండ్‌ నడుస్తోంది. దీంతో ఈ చిత్రం అదే జోనర్‌కు చెందిన చిత్రం కావడంతో ఈ సినిమాపై కూడా మంచి అంచనాలే ఉన్నాయి.