చిన్న సినిమాగా సైలెంట్ గా విడుదలై కలెక్షన్ల సునామి సృష్టించిన సినిమా బిచ్చగాడు. ఈ సినిమా ఎటువంటి ప్రచార ఆర్భాటాలు లేకుండా విడుదలై సంచలనం క్రియేట్ చేసింది. మౌత్ టాక్ తో మాత్రమే వందరోజులు విజయవంతంగా ఆడిన ఈ చిత్రం ఈ మధ్యకాలంలో బిచ్చగాడు అనే చెప్పాలి. ఈ చిత్రం చేసిన కలెక్షన్లకు బడా నిర్మాతలను సైతం ఆశ్చర్యానికి గురి చేసింది. కాగా ఈ చిత్రంలో హీరోగా నటించిన విజయ్ ఆంటోనికి టాలీవుడ్ లో మంచి పేరు రావడమే కాకుండా మాస్ లో విపరీతమైన క్రేజ్ కూడా సొంతమైంది.
అయితే స్వతహాగా సంగీత దర్శకుడైన విజయ్ ఆంటోనీ, ఈ చిత్రంలోని పాటలు కూడా సూపర్ హిట్ కావడంతో మంచి పేరు వచ్చింది. దాంతో బిచ్చగాడు సీక్వెల్ తీసేందుకు ముమ్మరంగా ప్రయత్నిస్తున్నాడు విజయ్ ఆంటోని. అయితే బిచ్చగాడు-2 చిత్రానికి సంబంధించి ఫ్రీప్రొడక్షన్ పనులు కూడా వేగవంతంగా జరుగుతున్నాయని టాక్ నడుస్తుంది. ప్రధానంగా బిచ్చగాడు-2లో నల్లధనం అంశంపై తెరకెక్కించాలనుకుంటున్నట్లు తెలుస్తుంది. కాగా దేశం మొత్తంలో పెద్ద నోట్ల రద్దు చేయడంతో భారతదేశ ప్రజలందరిలో నల్లధనం అంశం హాట్ టాపిక్ గా మారింది. అందుకనే నల్లధనం,పెద్జ నోట్ల రద్దు తర్వాత జరుగుతున్న పరిణామాలపై ఈ చిత్రం ప్రధానంగా ఉండబోతుందంటూ వెల్లడౌతుంది. అయితే బిచ్చగాడు బాగా కలెక్షన్ చేయడంతో బిచ్చగాడు-2 ని భారీ బడ్జెట్ తో దాదాపు రూ.50 కోట్లతో తెరకెక్కించాలని చిత్రబృందం భావిస్తున్నట్లు తెలుస్తుంది.అంతే కాకుండా ఈ సినిమాని తెలుగు, తమిళంలో డైరెక్టు మార్కెట్ ఉన్న విజయ్ ఆంటోనికి మలయాళం, కన్నడంలో కూడా విడుదల చేసే ప్లాన్ లో ఉన్నట్లు తెలుస్తుంది.