ఇటీవలే ఇండియన్‌ మాజీ కెప్టెన్‌ అజారుద్దీన్‌ స్వీయ జీవితం ఆధారంగా ఇమ్రాన్‌హష్మీ ప్రధాన పాత్రను పోషించిన బయోపిక్‌ మూవీ 'అజర్‌' చిత్రం విడుదలై డిజాస్టర్‌ టాక్‌ తెచ్చుకున్న సంగతి తెలిసిందే. కాగా ఈ చిత్రంలో తన పాత్రను అమ్మాయిల కోసం వెంపర్లాడే వాడిగా చిత్రీకరించడంతో ఇండియన్‌ మాజీ కెప్టెన్‌ రవిశాస్త్రి తీవ్ర ఆవేదన వ్యక్తం చేస్తున్నాడు. ఆయన ఇప్పటికే బిసిసిఐకి ఈ విషయమై ఫిర్యాదు చేసినట్లు సమాచారం. కాగా ఫిక్సింగ్‌లో అజర్‌ ఫ్రెండ్‌ మనోజ్‌ప్రభాకర్‌ కూడా తనను ఈ చిత్రంలో తప్పుగా చిత్రీకరించారని మండిపడుతూ పరువునష్టం దావా వేయడానికి సిద్దం అవుతుండటం గమనార్హం. మొత్తానికి చిత్రం హిట్‌ కాకపోయినా వివాదాల విషయంలో మాత్రం ఈ చిత్రం అన్నింటికంటే ముందుంది.