చంద్రబాబు కాళ్లకి బంధం వేస్తోన్న బిజెపి!

ఇటీవల తెలంగాణ ముఖ్యమంత్రి కేసీఆర్‌ కేంద్రం నుండి నిధులు తెచ్చుకోవాలనే లక్ష్యంతో ఢిల్లీ వెళ్లి ప్రధాని మోడీతో పాటు పలువురు కేంద్రమంత్రులను కలిశారు. ఈ సందర్భంగా ఆయన తెలంగాణకు కేంద్రం నుండి మరిన్ని నిధులు కావాలని కోరారు. అయితే కేంద్రం మాత్రం తమ పరిస్థితే ఇబ్బందిగా ఉందని, దాంతో తెలంగాణకు అదనపు నిధులు ఇవ్వలేమని స్పష్టం చేసినట్లు సమాచారం. అయితే తెలంగాణకు కేంద్రం మొండి చేయి చూపించిందనే నిందలు రాకుండా ఆర్థికంగా కేంద్రం పరిస్థితి చాలా ఇబ్బందుల్లో ఉందని చెప్పింది. దీంతో కేసీఆర్‌ ఏమీ మాట్లాడలేని పరిస్థితి ఎదురైంది. అయితే కేంద్రం ఇలా చెప్పడం వెనుక బిజెపి అగ్రనేతలు వ్యూహం దాగివుందని రాజకీయ విశ్లేషకులు విశ్లేషిస్తున్నారు. ఇప్పటికే ఏపీకి ప్రత్యేక హోదా ఇవ్వలేమని చెప్పిన కేంద్రం భవిష్యత్తులో తమ ఆర్దికపరిస్థితి బాగాలేదనే చెప్పి, ఏపీకి ఇవ్వాల్సిన రెవిన్యూలోటు, పోలవరం, రాజధానికి నిధులు వంటి విషయంలో చంద్రబాబు ముందు కాళ్లకి బంధాలు వేయడానికి సిద్దం అయిందని, అందులో భాగంగానే కేసీఆర్‌కు ముందస్తుగా రిక్త హస్తం చూపించదని విశ్లేషిస్తున్నారు.