ఛాలెంజింగ్‌ పాత్రలు చేయాలన్నా, తమకున్న స్టార్‌డమ్‌ను పట్టించుకోకుండా వైవిధ్యమైన పాత్రలకు జీవం పోయాలన్నా కమల్‌హాసన్‌ తర్వాత చియాన్‌ విక్రమ్‌ పేరే చెప్పుకోవాలి. ఇటీవల విడుదలైన శంకర్‌`విక్రమ్‌ల ‘ఐ’ చిత్రం అనుకున్న స్థాయిలో ఆడకపోయినప్పటికీ ఇందులో విక్రమ్‌ నటన చూసి యావత్‌ దేశం ఉప్పోంగిపోయింది. కాగా ప్రస్తుతం విక్రమ్‌ సమంతతో కలిసి మురుగదాస్‌ నిర్మాణంలో విజయ్‌మిల్టన్‌ దర్శకునిగా ‘10ఎంద్రకుల్లా’ చిత్రంలో నటిస్తున్నాడు. ఈ చిత్రం షూటింగ్‌ చివరి దశకు వచ్చింది. త్వరలో ఈ చిత్రాన్ని విడుదల చేసేందుకు సన్నాహాలు చేస్తున్నారు. ఈ చిత్రం షూటింగ్‌ పూర్తయిన వెంటనే విక్రమ్‌ మరో సినిమాకు ఓకే చెప్పాడు. మురుగదాస్‌ శిష్యుడు, ‘అరిమనంబి’ ఫేమ్‌ ఆనంద్‌ శంకర్‌ దర్శకత్వంలో విక్రమ్‌ ఓ సినిమా చేయనున్నాడు. ఈ చిత్రం టైటిల్‌ ‘మర్మమణితాన్‌’. తెలుగులో ఎవ్వరికీ అర్థంకాని మనిషి అని అర్థం. కాగా ఈ చిత్రంలో మొదట కాజల్‌, ప్రియాఆనంద్‌లను అనుకున్నారు. కానీ హఠాత్తుగా ఈ చిత్రం నుండి ప్రియాఆనంద్‌ తప్పుకోంది. కాగా ఆ స్థానంలో తెలుగు, తమిళ ప్రేక్షకులను తన అందం, అభినయంతో ఎంతగానో ఆకట్టుకున్న బిందుమాధవి ఎంపికయినట్లు సమాచారం. దీంతో బిందుమాధవి దశ తిరుగుతుందని కోలీవుడ్‌ మీడియా అంటోంది.