బాలీవుడ్‌ నటుడు సల్మాన్‌ఖాన్‌ 'హిట్‌ అండ్‌ రన్‌' కేసు ఆద్యాంతం ఆసక్తికరంగా సాగుతోంది. సంఘటన జరిగిన పదేళ్ల తర్వాత ఓ సాక్షి వాంగ్మూలం మార్చడం, సెషన్స్‌ కోర్టు ఐదేళ్ల జైలు శిక్ష విధిస్తే.. హైకోర్టు స్టే ఇవ్వడం ఇలా ఈ సంఘటనకు సంబంధించిన ప్రతి అంశం సినీఫక్కీలో కొనసాగుతున్నాయి. ఇక తాజాగా ఈ కేసుకు సంబంధించిన కొన్ని పత్రాలు కాలిపోయాయంటూ మహారాష్ట్ర ప్రభుత్వం నివేదించడం ఆసక్తికరంగా మారింది.
2002లో ముంబైలో సల్మాన్‌ ప్రయాణిస్తున్న కారు ఓ బేకరీ ముందు ఫుట్‌పాత్‌పై పడుకున్న వారికపైకి ఎక్కడంతో ఒకరు మృతిచెందగా పలువరు గాయపడ్డారు. అయితే 2002నుంచి కూడా ఈ కేసును వాదిస్తున్న లాయర్లు, కేసు విచారణకు ప్రభుత్వం చేసిన ఖర్చు తదితర వివరాలు కావాలంటూ కొన్నాళ్ల క్రితం సమాచార హక్కు చట్టం కింద ముంబైకి చెందిన ఆర్టీఏ కార్యకర్త దరఖాస్తు చేసుకున్నాడు. అయితే ఈ కేసుకు సంబంధించిన ఎలాంటి పత్రాలు తమవద్దలేవని, 2012లో జరిగిన ఓ అగ్ని ప్రమాదంలో అవన్ని కాలిపోయాయని ప్రభుత్వం ఆర్టీఏ కార్యకర్తకు సమాధానం ఇచ్చింది.