పవర్‌స్టార్‌ పవన్‌కళ్యాణ్‌, దాసరి నారాయణరావు కాంబినేషన్‌లో ఓ చిత్రం రాబోతోందని ఆమధ్య వార్తలు వచ్చాయి. ఎవరూ ఊహించని కాంబినేషన్‌లో సినిమా అనేసరికి అటు ఇండస్ట్రీ, ఇటు ప్రేక్షకులు కూడా ఆశ్చర్యపోయారు. అది జరిగే ప్రాజెక్ట్‌ కాదని కొట్టి పారేశారు. అయితే అదే ఇప్పుడు నిజం కాబోతోందని తెలుస్తోంది. ఈ చిత్రం అక్టోబర్‌లో సెట్స్‌పైకి వెళ్ళనుందని సమాచారం.
దాసరి నారాయణరావు నిర్మాతగా వ్యవహరించే ఈ చిత్రానికి మూడు కథలు రెడీ చేశాడట. ఆ మూడిరటిలో ఏ కథతో సినిమా చెయ్యాలనే ఫైనల్‌ డెసిషన్‌ కళ్యాణే తీసుకోవాల్సి వుంది. పవన్‌కళ్యాణ్‌, దాసరి కాంబినేషన్‌లో సినిమా వుందనే మాట వాస్తవమేనని తెలుస్తున్నప్పటికీ ఆ చిత్రానికి ఎవరు డైరెక్టర్‌ అనే విషయంలో సస్పెన్స్‌ కొనసాగుతోంది. ఒక కొత్త డైరెక్టర్‌ని ఈ సినిమా ద్వారా పరిచయం చెయ్యాలని దాసరి ఆలోచిస్తున్నారు. అయితే పవన్‌కళ్యాణ్‌లాంటి హీరోని డైరెక్ట్‌ చెయ్యడం అంటే ప్రస్తుతం కొత్త డైరెక్టర్‌ వల్ల అవుతుందా అనే సందేహం కూడా వారికి వుంది. పవన్‌ కళ్యాణ్‌ మాత్రం ఈ చిత్రాన్ని ‘గోపాల గోపాల’ చిత్రాన్ని డైరెక్ట్‌ చేసిన కిషోర్‌కుమార్‌ పార్థసాని చేతుల్లో పెట్టాలని ఆలోచిస్తున్నాడట. ఎందుకంటే ‘గోపాల గోపాల’ టైమ్‌లోనే కిశోర్‌తో సినిమా చేస్తానని ప్రామిస్‌ చేసిన పవన్‌ మంచి సబ్జెక్ట్‌ వుంటే చెప్పమని అడిగాడు. ఎలాగూ ఈ సినిమాకి ఒక మంచి డైరెక్టర్‌ కావాలి. అదేదో కిశోర్‌తోనే చేయిస్తే బాగుంటుందని పవన్‌కళ్యాణ్‌ సజెస్ట్‌ చేశాడట.
అన్నీ అనుకున్నట్టుగానే జరిగితే ఈ చిత్రం ‘గబ్బర్‌సింగ్‌2’ తర్వాత స్టార్ట్‌ అయ్యే అవకాశం వుంది. మే 29న ‘గబ్బర్‌సింగ్‌2’ షూటింగ్‌ పూనేలో ప్రారంభం కానున్న విషయం తెలిసిందే. సో, పవన్‌, దాసరి కాంబినేషన్‌లో ఒక కొత్త తరహా సినిమా తెలుగు ప్రేక్షకుల ముందుకు రానుందన్నమాట.