ఇండస్ట్రీలో ఔదార్యానికి పవన్‌కల్యాణ్‌ పెట్టింది పేరు. గతంలో ఖమ్మంలో తీవ్ర అనారోగ్యంతో ఉన్న శ్రీజ అనే చిన్నారి కోరిక మేరకు ఆమెను పవన్‌ పరామర్శించిన సంగతి గురుండే ఉంటుంది. ఆ బాలిక తిరిగి కోలుకుంటే తాను మళ్లీ కలుస్తానని పవన్‌ హామీ ఇచ్చారు. అదృష్టవశాత్తు శ్రీజ పూర్తిగా కోలుకోవడంతో పవన్‌ ఆదివారం ఉదయం తన కార్యాలయంలో శ్రీజను మళ్లీ కలుసుకున్నారు. శ్రీజ కోలుకోవడానికి కారణమైన వైద్యులకు పవన్‌ కృతజ్ఞతలు తెలిపారు. అయితే ఈ సమయంలో పవన్‌ పూర్తిగా ఓ కొత్త గెటప్‌లో కనిపించారు. పెరిగిన గడ్డం, జుట్టుతో ఆయన సరికొత్త స్టైల్‌లో దర్శనమిచ్చారు. అయితే పవన్‌ సినిమాలో క్యారెక్టర్‌ కోసం గడ్డం, జట్టు పెంచుతున్నారా..? లేక ప్రస్తుతం ఖాళీగా ఉండటంతో అలా మెయిన్‌టైన్‌ చేస్తున్నారా.. ? అనేది అర్థంకాకుండా ఉంది. ఇక ప్రస్తుతం స్క్రిప్ట్‌ వర్క్‌ జరుపుకుంటున్న గబ్బర్‌సింగ్‌ త్వరలోనే పట్టాలక్కే అవకాశాలు కనిపిస్తున్నాయి.