రామ్‌చరణ్‌, వి.వి.వినాయక్‌ కాంబినేషన్‌లో ‘నాయక్‌’ వంటి సూపర్‌హిట్‌ చిత్రాన్ని నిర్మించిన డి.వి.వి.దానయ్య మళ్ళీ చరణ్‌తో శ్రీను వైట్ల డైరెక్షన్‌లో ఓ సినిమా చేస్తున్న విషయం తెలిసిందే. ఈ చిత్రానికి సంబంధించిన షూటింగ్‌ ఈరోజు(జూన్‌ 3) నుంచి హైదరాబాద్‌లో జరుగుతోంది. రామ్‌చరణ్‌, హీరోయిన్‌ రకుల్‌ ప్రీత్‌లతోపాటు చిత్రంలోని ప్రధాన తారాగణం అంతా పాల్గొనే కొన్ని ముఖ్యమైన సన్నివేశాలను ఈ షెడ్యూల్‌లో చిత్రీకరిస్తారు. మే 21 నుంచి 30 వరకు యూరప్‌లో రామ్‌చరణ్‌, రకుల్‌ప్రీత్‌లపై పాటల చిత్రీకరణ జరిగింది. ఈ చిత్రంలో రకుల్‌ ప్రీత్‌తోపాటు కృతి కర్బంద కూడా ఓ హీరోయిన్‌గా నటిస్తోంది. దాదాపు అందరు టాప్‌ హీరోలతో సూపర్‌హిట్‌ చిత్రాలను రూపొందించిన శ్రీను వైట్ల ఫస్ట్‌ టైమ్‌ రామ్‌చరణ్‌తో చేస్తున్న ఈ యాక్షన్‌ ఎంటర్‌టైనర్‌ కూడా పెద్ద హిట్‌ అవుతుందన్న కాన్ఫిడెన్స్‌తో వున్నాడు నిర్మాత డి.వి.వి.దానయ్య. శరవేగంగా షూటింగ్‌ జరుపుకుంటున్న ఈ చిత్రానికి సంబంధించిన పోస్ట్‌ ప్రొడక్షన్‌ వర్క్‌ కూడా మరో పక్క జరుగుతోంది. అక్టోబర్ 15న ఈ చిత్రాన్ని రిలీజ్‌ చెయ్యాలని దర్శకనిర్మాతలు ప్లాన్‌ చేస్తున్నారు.