రవితేజ, సురేందర్‌రెడ్డి కాంబినేషన్‌లో వచ్చిన ‘కిక్‌’తో మ్యూజిక్‌ డైరెక్టర్‌గా పరిచయమైన ఎస్‌.ఎస్‌.థమన్‌ దాదాపు 6 సంవత్సరాల తర్వాత మళ్ళీ అదే కాంబినేషన్‌లో రూపొందుతున్న సీక్వెల్‌ ‘కిక్‌2’ చిత్రానికి కూడా సంగీతం అందించాడు. కిక్‌ పాటలు సూపర్‌హిట్‌ అయ్యాయి. మరి కిక్‌2 ఆడియో శ్రోతలకు ఏ రేంజ్‌లో కిక్‌ ఇచ్చిందో చూద్దాం.
ఈ ఆల్బమ్‌లో మొదటి పాట బొంబాయి భోలే రచించి గానం చేసిన ‘మమ్మీ’. ఈ పాటకు భోలే సాహిత్యం అందించాడు అనే కంటే కొన్ని పిచ్చి మాటలతో పాట తయారు చేశాడని చెప్పొచ్చు. దానికి తగ్గట్టుగానే ఈ పాటను పాడాడు. ఈ పాట రికార్డింగ్‌ క్వాలిటీ కూడా చాలా తక్కువగా వుంది. వరికుప్పల యాదగిరి రాసిన రెండో పాట ‘నువ్వే నువ్వే’. ఈ పాటను జోనిటా గాంధీ, థమన్‌ పాడారు. థమన్‌ గతంలో చేసిన పాటలాగే అనిపించినా మెలోడీ సాంగ్‌గా ఆకట్టుకుంటుంది. మూడోపాట శ్రీమణి రాసిన ‘జెండాపై కపిరాజు’. ఈ పాటను దివ్యకుమార్‌, జోనిట గాంధీ, రాహుల్‌ నంబియార్‌, దీపికా నివాస్‌, హనుమంతరావు గానం చేసిన ఈ పాట హీరో క్యారెక్టరైజేషన్‌ని తెలుపుతుంది. సిట్యుయేషన్‌ పరంగా వచ్చే ఈ పాట సినిమాలో ఆకట్టుకునే అవకాశం వుంది. సంగీతపరంగా, సాహిత్యపరంగా చూస్తే మళ్ళీ మళ్ళీ వినాలనిపించే పాట కాదు. నాలుగో పాట వరికుప్పల యాదగిరి రాసిన ‘మస్తానీ మస్తానీ’. దీపక్‌, మాన్సి పాడిన ఈ పాట లిరిక్‌ పరంగా, మ్యూజిక్‌ పరంగా మాస్‌ పాటలా అనిపిస్తుంది. వినగా వినగా బాగుందనిపిస్తుంది. ఈ పాటకి సినిమా రిలీజ్‌ అయిన తర్వాత ఎక్కువ పాపులారిటీ వచ్చే అవకాశం వుంది. ఐదోపాట శ్రీమణి రాసిన ‘టెంపుల్‌ సాంగ్‌’. నివాస్‌, రాహుల్‌ నంబియార్‌, సంజన, మోనిషా గానం చేసిన ఈ పాట కూడా సిట్యుయేషనల్‌ సాంగ్‌గా వస్తుంది. సినిమాతోపాటు చూడడానికి తప్ప వినడానికి అంత ఇంపుగా లేని పాట ఇది. ఆరోపాట కాసర్ల శామ్‌ రచించిన ‘కిక్‌’ టైటిల్‌ సాంగ్‌. ఈ పాటను సింహ, స్ఫూర్తి గానం చేశారు. ఏమాత్రం కొత్తదనం లేని పాట ఇది. సాహిత్యంగానీ, మ్యూజిక్‌గానీ ఇంతకుముందు విన్న పాటలాగే అనిపిస్తుంది. సినిమాలో వచ్చి పోయే పాట తప్ప ఎలాంటి ప్రత్యేకత లేదు. ఈ పాటకు సంబంధించి విశేషంగా చెప్పుకోవాలంటే 13 సంవత్సరాల స్ఫూర్తి ఈ పాటను సింహాతో కలిసి పాడిరది.
‘కిక్‌’తో పోల్చుకుంటే ‘కిక్‌2’ ఆడియో అంతగా ఆకట్టుకునేలా లేదు. థమన్‌ మొదటి సినిమా కిక్‌లోని పాటలు చాలా ఫ్రెష్‌గా వుండడమే కాకుండా డిఫరెంట్‌ ఆర్కస్ట్రయిజేషన్‌తో మళ్ళీ మళ్ళీ వినేలా చేశాయి. ఆ పాటలు సినిమాకి కూడా చాలా ప్లస్‌ అయ్యాయి. ‘కిక్‌2’ ఆడియో విషయానికి వస్తే సాహిత్యపరంగా, సంగీత పరంగా చెప్పుకోదగిన విశేషాలు ఏమీ లేవు. ఈమధ్యకాలంలో వచ్చిన థమన్‌ ఆడియోల్లో సినిమాకి చాలా మైనస్‌ అయ్యే ఆడియో ఇది.