ఎగ్రెసివ్‌ హీరో గోపిచంద్‌ కథానాయకుడుగా యు.వి.క్రియయేషన్స్‌ పతాకంపై రాధాకృష్ణ కుమార్‌ దర్శకత్వంలో ప్రమోద్‌, వంశీ నిర్మిస్తున్న చిత్రం ‘జిల్‌’. ఈ చిత్రం ఆడియో ఆవిష్కరణ గురువారం హైదరాబాద్‌లోని శిల్పకళావేదికలో పలువురు సినీ ప్రముఖుల నడుమ ఘనంగా జరిగింది. ఈ కార్యక్రమానికి ముఖ్యఅతిథిగా విచ్చేసిన యంగ్‌ రెబల్‌స్టార్‌ ప్రభాస్‌ ఆడియోను ఆవిష్కరించి హీరో గోపీచంద్‌కి తొలి సి.డి.ని అందించారు. గిబ్రాన్‌ సంగీత సారధ్యంలో రూపొందిన ఈ ఆడియో జంగ్లీ మ్యూజిక్‌ ద్వారా మార్కెట్‌లోకి విడుదలైంది. ఇంకా ఈ ఆడియో వేడుకలో సంగీత దర్శకుడు జిబ్రాన్‌, సినిమాటోగ్రాఫర్‌ శక్తి శరవణన్‌, రాశిఖన్నా, కబీర్‌, శ్రీవాస్‌, విజయ్‌కుమార్‌ కొండా, సుజీత్‌, శ్రీమణి, భవ్య ఆనంద్‌ప్రసాద్‌, రామజోగయ్య శాస్త్రి, లక్ష్మణ్‌, మారుతి, డైరెక్టర్‌ జి.అశోక్‌, కృష్ణకాంత్‌ తదితరులు పాల్గొన్నారు. ఈ సందర్భంగా...
ప్రభాస్‌: నేను హీరో అవక ముందే గోపీకృష్ణా మూవీస్‌ ఆఫీస్‌లో మొదటిసారి కలిసాను. వర్షం చిత్రంతో మేం బాగా క్లోజ్‌ అయ్యాం. ఈ చిత్రంలో నాకు ‘స్వింగ్‌ స్వింగ్‌’ అనే పాట బాగా నచ్చింది. నేను, గోపీ టైమ్‌ దొరికినపుడు స్టోరీ డిస్కషన్స్‌ కూడా చేసుకుంటూ వుంటాం. ఈ చిత్రానికి రాధాకృష్ణ మంచి కథ, స్క్రీన్‌ప్లే అందించాడు. జిబ్రాన్‌ మ్యూజిక్‌ చాలా బాగుంది. ఆడియో తప్పకుండా మంచి హిట్‌ అవుతుంది. అలాగే సినిమా కూడా పెద్ద హిట్‌ కావాలని కోరుకుంటున్నాను.
గోపీచంద్‌: ఈ కథ ఏడాదిన్నర క్రితం రాధాకృష్ణ నాకు చెప్పాడు. పాయింట్‌ నాకు బాగా నచ్చింది. ఈ సినిమా నాతో చెయ్యాలని చాలా కాలం వెయిట్‌ చేశాడు. ఈ మంచి కథకి మంచి నిర్మాతలు దొరికారు. ఈ ముగ్గురూ నన్ను కొత్తగా ప్రెజెంట్‌ చెయ్యాలని డిసైడ్‌ అయి ఈ సినిమా స్టార్ట్‌ చేశారు. ఈ సినిమాలో నా లుక్‌ చాలా కొత్తగా అనిపిస్తుంది. జిబ్రాన్‌ చాలా మంచి మ్యూజిక్‌ ఇచ్చాడు. పాటలకు తగినట్టు రాజసుందరంగారు మంచి డాన్స్‌ కంపోజ్‌ చేశారు. ఈ చిత్రంలో కొత్త విలన్‌ కబీర్‌ చాలా అద్భుతంగా చేశాడు. అతనికి విలన్‌గా చాలా మంచి భవిష్యత్తు వుంది. సినిమాటోగ్రాఫర్‌ శక్తి శరవణన్‌ నన్ను చాలా బాగా చూపించారు. డెఫినెట్‌గా ఈ సినిమా అందరికీ నచ్చుతుంది.
రాధాకృష్ణకుమార్‌: ఇంత మంచి సినిమా చేసే అవకాశం ఇచ్చిన నిర్మాతలకు నా ధన్యవాదాలు. ఈ నిర్మాతలు వంశీ, ప్రమోద్‌ నా బ్రదర్స్‌లా నాకు ఎంతో సహకరించారు. అలాగే గోపీచంద్‌ కోఆపరేషన్‌ ఎప్పటికీ మర్చిపోలేను.
వి.ఆనంద ప్రసాద్‌: ఒక మంచి చిత్రాన్ని ప్రేక్షకులకు అందిస్తున్న ఈ దర్శకనిర్మాతలకు నా అభినందనలు తెలియజేస్తున్నాను. తప్పకుండా యు.వి.క్రియేషన్స్‌ ఈ చిత్రంతో హ్యాట్రిక్‌ కొడుతుంది.
విజయ్‌కుమార్‌ కొండా: ఈ సినిమా టైటిల్‌ చాలా కొత్తగా వుంది. అలాగే గోపీచంద్‌ లుక్‌లోగానీ, పాటల్లోగానీ చాలా కొత్తదనం కనిపిస్తోంది. ఈ ఆడియో, సినిమా పెద్ద హిట్‌ కావాలని మనస్ఫూర్తిగా కోరుకుంటున్నాను.
శ్రీవాస్‌: గోపిచంద్‌ ‘లక్ష్యం’తో నన్ను డైరెక్టర్‌ని చేశారు. నా బ్రదర్‌లాంటి ఆయనకి ఈ సినిమా పెద్ద హిట్‌ కావాలి. రాధాకృష్ణకి తొలి సినిమాకే మంచి నిర్మాతలు దొరికారు. తప్పకుండా ఈ సినిమా పెద్ద హిట్‌ అవుతుంది.
మారుతి: మంచి అభిరుచి వున్న నిర్మాతలు వంశీ, ప్రమోద్‌. వాళ్ళు చేసే సినిమాలన్నీ చాలా డిఫరెంట్‌గా వుంటున్నాయి. ఈ సినిమాతో గోపీచంద్‌గారికి మరో సూపర్‌హిట్‌ ఇవ్వబోతున్నారు. ఈ చిత్రంలో విజువల్స్‌ అన్నీ చాలా బాగున్నాయి. తప్పకుండా ఈ సినిమా పెద్ద హిట్‌ అవుతుంది.
జిబ్రాన్‌: యు.వి.క్రియేషన్స్‌ బేనర్‌లో మరో సినిమా చేసే అవకాశం వచ్చినందుకు చాలా ఆనందంగా వుంది. ప్రమోద్‌, వంశీ, రాధాకృష్ణగారు నన్ను బాగా సపోర్ట్‌ చేశారు. సినిమా మంచి విజయాన్ని సాధిస్తుందన్న నమ్మకం వుంది. పాటలు కూడా అందరికీ నచ్చుతాయి.