ఎవడిగోల వాడిది చిత్రంతో ప్రారంభమైన రామలక్ష్మీ సినీ క్రియేషన్స్‌ బేనర్‌పై స్టైల్‌, వియ్యాలవారి కయ్యాలు, పోటుగాడు వంటి సూపర్‌హిట్‌ చిత్రాలను నిర్మించి ఉత్తమాభిరుచిగల నిర్మాతగా పేరు తెచ్చుకున్నారు లగడపాటి శ్రీధర్‌. ఈ సంస్థ చిత్ర నిర్మాణం ప్రారంభించి పది సంవత్సరాలు పూర్తి చేసుకున్న సందర్భంగా మంగళవారం సంస్థ కార్యాలయంలో విలేకరుల సమావేశాన్ని ఏర్పాటు చేసి ఈ సంస్థ తాజాగా నిర్మిస్తున్న ‘కృష్ణమ్మ కలిపింది ఇద్దరిని’ చిత్ర విశేషాలను తెలియజేశారు. సుధీర్‌బాబు, నందిత జంటగా నటిస్తున్న ఈ చిత్రానికి ఆర్‌.చంద్రు దర్శకత్వం వహిస్తున్నారు. ఎల్‌.వి.రామానాయుడు సమర్పణలో శ్రీమతి లగడపాటి శిరీష, లగడపాటి శ్రీధర్‌ ఈ చిత్రాన్ని నిర్మిస్తున్నారు. ఈ సందర్భంగా నిర్మాత లగడపాటి శ్రీధర్‌ మాట్లాడుతూ...
‘‘మా బేనర్‌లో వచ్చిన మొదటి సినిమా ఎవడిగోల వాడిది సిల్వర్‌ జూబ్లీ ఫంక్షన్‌ జరుపుకుంది. ఆ సినిమా తర్వాత కొన్ని మంచి చిత్రాలు చేసి వరస విజయాలు అందుకున్నాము. అదే ఉత్సాహంతో కన్నడంలో సూపర్‌హిట్‌ అయిన ఛార్మినార్‌ చిత్రాన్ని తెలుగులో రీమేక్‌ చేస్తున్నాం. డైరెక్టర్‌ చంద్రు ఈ చిత్రాన్ని చాలా అద్భుతంగా తీస్తున్నారు. ప్రస్తుతం పోస్ట్‌ ప్రొడక్షన్‌ వర్క్‌ జరుగుతోంది. ఈనెల 25న ఈ చిత్రం ఆడియోను విజయవాడలో రిలీజ్‌ చేయబోతున్నాం. ఇప్పటికే ఈ ఆడియోకి సంబంధించిన ఐ రింగ్‌టోన్స్‌ విడుదల చేశాం. వాటికి చాలా మంచి రెస్పాన్స్‌ వస్తోంది. ఫిబ్రవరి 8న హైదరాబాద్‌లో ఆడియో సక్సెస్‌మీట్‌ ఏర్పాటు చేయనున్నాం. ఫిబ్రవరి 14న వాలెంటైన్స్‌ డే రోజున చిత్రాన్ని రిలీజ్‌ చేయడానికి ప్లాన్‌ చేస్తున్నాం.