హాలీవుడ్‌లోకి కోలీవుడ్‌ హీరో..!!

తమిళ కథానాయకుడు విజయ్‌ హాలీవుడ్‌లో అరంగేట్రం చేయనున్నారా..? అంటే నిజమేనంటునానయి కోలీవుడ్‌ వర్గాలు. సైకలాజికల్‌ థ్రిల్లర్‌ కథాంశంతో తమిళంలో అప్సర కుమార్‌ రూపొందిస్తున్న చిత్రం 'ఒన్నుమే పురియాలా'. జాక్‌ మైఖేల్‌, హరిణి, విద్య ప్రధాన పాత్రల్లో నటిస్తున్న ఈ చిత్రం విడుదలకు సిద్ధమైంది. తాజాగా ఈ చిత్రాన్ని హాలీవుడ్‌లో రీమేక్‌ చేసేందుకు సన్నాహాలు జరుగుతున్నాయి. ఇటీవలే ఈ సినిమా పునర్నిర్మాణ హక్కుల్ని యూరోపియన్‌ అగ్ర నిర్మాణ సంస్థ సొంతం చేసుకున్నట్లు తెలిసింది. కథానుగుణంగా భారతీయ అగ్ర కథానాయకుడితో ఈ చిత్రాన్ని నిర్మించాలని భావించిన వారు ఇందుకోసం విజయ్‌ను హీరోగా ఎంపిక చేసుకున్నట్లు తెలిసింది. ఆంగ్లంతోపాటు జర్మన్‌ భాషలో ఈ చిత్రాన్ని తెరకెక్కించనున్నట్లు సమాచారం. ప్రస్తుతం విజయ్‌ 'పులి' చిత్రంలో కథానాయకుడిగా నటిస్తున్నాడు.